पोखरा । मुक्तक मञ्च केन्द्रीय समितिले विद्यालयदेखि विश्वविद्यालय तहको पाठ्यक्रममा मुक्तक समावेश गर्नुपर्ने माग गरेको छ । मञ्चले सो मागसहित सञ्चालन गरेको ‘पाठ्यक्रममा मुक्तक समावेश अभियान’ ले दबाबमूलक मुक्तक वाचन कार्यक्रमसहित जिल्ला शिक्षा समन्वय इकाइ समिति कास्कीमा ज्ञापनपत्र बुझाएको छ ।

ज्ञापनपत्र बुझ्दै प्रमुख डा. नारायणप्रसाद सुवेदीले भने, ‘मुक्तक छोटो, प्रभावकारी र निकै लोकप्रिय विधा रहे तापनि यो केही कमजोरीले पाठ्यक्रममा छुटेको हुन सक्ने उल्लेख गर्दै अबको पाठ्यक्रममा यो विधा नछुट्ने प्रतिबद्धता जनाउँछु ।’
पछिल्लो समय साहित्यका विभिन्न विधालाई विभिन्न तहका पाठ्यक्रम र पठ्यपुस्तकमा समावेश गरी अध्ययन÷अध्यापन गरिंदै आएको भए पनि मुक्तक विधालाई पाठ्यक्रममा समावेश गरी अध्ययन/अध्यापन गराउने गरिएको छैन ।

मुक्तक मञ्चका अध्यक्ष रामजीप्रसाद आचार्य भने, ‘नेपाली साहित्यकै काव्यविधामा पर्ने मुक्तकले नेपाली भाषा र साहित्यप्रेमीमाझ जुन लोकप्रियता पाएको छ, औपचारिक अध्ययन अध्यापनमा भने यसले त्यति महत्व नपाएको महसुस हामीले गरेका छौं ।’

‘काव्यको लघुतम विधाका रुपमा सामान्य चिनारीसहित पाठ्यक्रममा समावेश गरिएको भए पनि मुक्तककै सिद्धान्त तथा मुक्तकलाई भने समावेश नगरिएको अवस्थामा विद्यालयदेखि विश्वविद्यालय तहसम्मका पाठ्यक्रममा क्रमशः मुक्तकको सैद्धान्तिक तथा रचनागत रुपमा समावेश गरियोस् भन्ने हेतुले मुक्तक मञ्च, पोखराद्वारा चरणबद्ध रुपमा यो अभियानलाई अघि बढाएको सर्वविदितै छ । आफ्नो अभियानलाई प्रभावकारी बनाउन पछिल्लो समय दबाबमूलक कार्यक्रमलाई सम्बन्धित निकायमा पु¥याउन नियमित कार्यक्रम गरेको संयोजक नवीन भण्डारी बताए ।

कार्यक्रममा मुक्तक मञ्चका सहसचिव श्रद्धा आचार्य, भरत पोखरेल, सदस्य गौरव ढुंगाना, सौगात तिमिल्सिना, अभियान सदस्य विष्णु सुवेदी, सम्पूर्ण पौडेल, मधुसुदन न्यौपाने, एसपि असफल लगायतले सो माग पेस गरेका थिए ।