म्याग्दी । बिएन्डबि फाउन्डेसनले मालिका ४ का समाजसेवी एवं अस्का छापस्थित शिव आधारभूत विद्यालयका पूर्व प्रअ गोकुल घर्तीमगर र च्युरिबोटस्थित सिद्धार्थ माविका उत्कृष्ट २ विद्यार्थीलाई सम्मान गरेको छ ।

सोमबार सिद्धार्थ माविद्वारा आयोजित कार्यक्रममा फाउन्डेसनले पूर्व प्रअ एवं समाजसेवी घर्तीमगरलाई १० हजार र कक्षा १० का छात्रतर्फ हिमाल घर्तीमगर र छात्रातर्फ दर्पना घर्तीमगरलाई उत्कृष्ट विद्यार्थीको रुपमा जनही ५ हजार रुपैयाँ र प्रमाणपत्रले सम्मान गरेको हो । घर्तीमगरलाई वडाको शैक्षिक सुधार सहित समाजिक क्षेत्रमा पुर्‍याएको योगदानको आधारमा सम्मान गरिएको फाउन्डेसनले जनाएको छ ।

सो पुरस्कार विद्यालय व्यवस्थापन समिति अध्यक्ष तमबहादुर पुन, फाउन्डेसनका अभिभावक नरबहादुर चोचांगी र विद्यालय प्रअ ललितबहादुर घर्तीमगरले संयुक्तरुपमा हस्तान्तरण गरेको शिक्षक छकप्रसाद घर्तीमगरले जानकारी दिए । सो अवसरमा फाउन्डेसनले विद्यार्थीलाई शैक्षिक सामग्री समेत वितरण गरेको छ ।

समाजसेवी बलबहादुर चोचांगी पुन र बागवीर चोचांगी पुनद्वारा स्थापित फाउन्डेसनले २०७३ सालदेखि हरेक वर्ष विभिन्न क्षेत्रमा योगदान पुर्‍याएका व्यक्तिलाई नगदसहित सम्मान गर्दै आइरहेको छ । २०३५ सालदेखि शिक्षण सेवा सुरु गरेका घर्तीमगरले सोही वडाको खबाङ आधारभूत विद्यालय, ओखबोट मावि र शिव आधारभूत विद्यालयमा प्रअको रुपमा अध्यापन गराएका थिए ।

यस्तै, स्व.मनमाया घर्तीमगरको स्मृतिमा छोराहरु गोकुल घर्तीमगर, दलकुमार घर्तीमगर, प्रेमबहादुर घर्तीमगर र छोरी लाली थापामगरले विद्यालयको सिद्धार्थ मावि अक्षयकोषको लागि १ लाख १५ हजार सहयोग गरेका छन् ।

शिक्षक प्रदीप पौडेलले स्वागत, शिक्षक छकप्रसाद घर्तीमगरले संचालन गरेका थिए । अक्षयकोषलाई अहिलेसम्म २० लाख रुपैयाँ बढी सहयोग प्राप्त भएको विद्यालयले जनाएको छ । विद्यालयमा १ सय ७० बढी विद्यार्थी पढ्छन् ।