पोखरा । नेपाल एसोसिएसन अफ टुर एन्ड ट्राभल्स एजेन्ट्स (नाट्टा), गण्डकीमा हरिराम अधिकारीको अध्यक्षतामा नयाँ कार्यसमिति निर्वाचित भएको छ । संस्थाको सोमबार २७ औं साधारणसभा तथा १२ औं अधिवेशनबाट अधिकारीको अध्यक्षतामा नयाँ कार्यसमिति सर्वसम्मत् चयन भएको हो ।

कार्यसमिति प्रथम उपाध्यक्षमा किशोर दाहाल, द्वितीय उपाध्यक्ष कमला गिरी, महासचिव संगीता पौडेल, सचिव चेतन कार्की, कोषाध्यक्ष नवराज भण्डारी र सहकोषाध्यक्ष सुभाष पहारी चयन भए ।

सदस्यमा सन्दीप श्रेष्ठ, ताराप्रसाद गौतम, खेमबहादुर नेपाली, सुशीला सिग्देल, तुलबहादुर गुरुङ, गणेश पोख्रेल, रत्नराज रेग्मी छन् । कार्यसमितिको कार्यकाल २ वर्षको हुनेछ ।

यसअघि साधारणसभा उद्घाटन समारोहमा गण्डकी प्रदेशका प्रदेश प्रमुख पृथ्वीमान गुरुङले एडम टुर्स एन्ड ट्राभल्समा कार्यरत सिनियर टिकेटिङ अफिसर अशोक पौडेललाई मनोहरा स्मृति पर्यटन पुरस्कार प्रदान गरे । यस्तै, गण्डकी प्रदेशको पर्यटनमा उल्लेख्य टेवा पुर्‍याएवापत नेप्लिज इन्काउन्टर टुर्स एन्ड ट्राभल्सका प्रबन्ध निर्देशक नारायणप्रसाद पहारी र बुद्ध टुर्स एण्ड ट्राभल्सका प्रबन्ध निर्देशक डिल्लीप्रसाद गौतमलाई सम्मान गरिएको थियो ।

सोही समारोहबीच विश्व सम्पदा दिवस अवसरमा गण्डकी प्रदेशका धार्मिक, सांस्कृतिक, पर्यटकीयस्थलहरुको बारेमा पुरातत्व विभागका प्रमुख रमेशराज पौडेल र प्राडा नारायणप्रसाद अधिकारीले कार्यपत्र प्रस्तुत गरेका थिए । संस्थाका अध्यक्ष सञ्जयकान्त सिग्देलको अध्यक्षतामा भएको कार्यक्रमको संचालन महासचिव कमला गिरीले गरेकी थिइन् ।