पोखरा । स्थानीय तहको मिति नजिककिँदै गर्दा दलहरुभने उम्मेदवार चयनमै अलमलिएका छन् । एकातिर दलभित्रको तानातान र दाबी अनि अर्कोतिर गठबन्धनका दलबीच बाँडफाँटको रस्साकस्सी ।

पहिलो चरणमा महानगर र उपमहानगरमा बाँडफाँट टुंग्याउने भनिए पनि गठबन्धन टुंगोमा पुग्न सकेको छैन । पोखरा महानगरपालिकाको मेयरमा एकीकृत समाजवादी र कांग्रेसले दाबी गरेर टसमस नभए पछि सबैको ध्यान पोखरामा केन्द्रित भएको छ ।

हिजो सोमबार कांग्रेस कास्की र पोखरा महानगरले अलग अलग विज्ञप्ति निकालेर एकीकृत समाजवादीले अस्वभाविक राखेर अनिर्णयको बन्दी बनाइएको भन्दै सहकार्य गर्न नसकिने बताइसकेका छन् ।

पोखराको मेयरमा सहमति पेचिलो बन्दै गएपछि कांग्रेस सभापति शेरबहादुर देउवाले कांग्रेस गण्डकीका सभापति शुक्रराज शर्मा, नेता यज्ञबहादुर थापा र कास्की सभापति किशोरदत्त बराललाई काठमाडौं बोलाएका छन् । तिनै जनाको टोली मंगलबार बिहानै काठमाडौंका लागि हिँडेको छ ।