पोखरा । महानगर र उपमहानगरको भागबण्डका लागि केन्द्रमा गठबन्धनका दलहरु टुंगोमा नपुग्दै कास्कीमा भने कांग्रेसले नेकपा एकीकृत समाजवादीसँग तालमेल कुनै हालतमा गर्न नसकिने बताएको छ ।

पोखराको मेयरमा दाबी गरिरहेको एकीकृत समाजवादीलाई अहिलेको अस्थामा कुनै हालतमा दिन नसकिने भन्दै कास्की कांग्रेसले सोमबार विज्ञप्ति नै निकालेको छ । तर केन्द्रको निर्णय नआउँदासम्म यहाँको निर्णयको कार्यान्वयन कति हुन्छ भन्ने पक्ष भने बाँकी नै छ ।

कास्की कांग्रेस सचिव भानु ढकाल र देवेन्द्र रानाभाटको संयुक्त हस्ताक्षरमा जारी विज्ञप्तिमा जिल्ला संयन्त्रबाट निर्वाचनका लागि तालमेल गर्ने सम्बन्धमा नेकपा एकीकृत समाजवादीसँग कास्की जिल्लामा व्यापक छलफल हुँदा पनि उक्त पार्टीको अस्वभाविक दाबीका कारणले निष्कर्ष निस्कन नसकेको र पार्टीका मातहतका निकायको माग मध्यनजर गरी अन्य गठबन्धनका दलसँग तालमेलका लागि वार्ता र संवाद अगाडि बढाउने र एकीकृत समाजवादीसँग स्थानीय निर्वाचनमा मैत्रीपूर्ण र स्वच्छ प्रतिष्पर्धासहित जाने निर्णय गरियो, उल्लेख छ ।

कुन दलको कहाँ दाबी

एकीकृत समाजवादीले पोखरा महानगरको नेतृत्व मागेको छ । यस्तै नेकपा एसले बुटवल, हेटौंडा र इटहरी उपमहानगरपालिकामा पनि आफ्नो नेतृत्व हुनुपर्ने दाबी गरेको छ ।

जनता समाजवादी पार्टी जसपाले वीरगञ्ज महानगरपालिकाको नेतृत्व दाबी गरेको छ भने विराटनगर महानगरपालिकाको उपप्रमुख मागेको छ ।
माओवादी केन्द्रले भरतपुर महानगरपालिकासँगै बाराको जितपुर–सीमरा र दाङको घोराही उपमहानगरपालिकाको नेतृत्व दाबी गरेको छ ।

दावीकर्ता दलहरुले नै कांग्रेसलाई काठमाडौं, ललितपुर र विराटनगर महानगरपालिकाको नेतृत्व लिन प्रस्ताव गरेको स्रोतले बताएको छ ।

यसैबीच, माओवादी केन्द्रका अध्यक्ष प्रचण्ड पूर्वनिर्धारित पत्रकार सम्मेलनका लागि बाहिरिएपछि अन्य नेताहरू खाना खान निष्किएका छन् ।