स्याङ्जा । प्रजातान्त्रिक विचार समाज स्याङ्जाको चौथो जिल्ला अधिवेशनले युक्तबहादुर बोगटीको अध्यक्षतामा १३ सदस्यीय जिल्ला कार्य समिति चयन गरेको छ । उपाध्यक्ष रामचन्द्र अर्याल, सचिव सीता गौडेल, कोषाध्यक्ष कमलराज लम्साल, सहसचिव ऋषि भण्डारी चयन भए ।

सदस्यहरु हेमप्रसाद गैहे, अनुप श्रेष्ठ, हेमकान्त गौतम, विष्णु गैह्रे, भवानी अधिकारी, कुशल काफ्ले, शान्ता थापा र चण्डिका भट्टराई छन् । अधिवेशनबाट मुक्तिप्रसाद सुवेदी, जीवलाल काफ्ले र मुक्तिप्रसाद रेग्मीलाई सल्लाहकार चयन गरेको छ ।

अधिवेशन उद्घाटन गर्दै समाजका केन्द्रीय सचिव एवं प्राडा वासुदेव भण्डारीले प्रजातान्त्रिक विचार समाज समाजका नकारात्मक एवं सकारात्मक पक्षबारेमा आफ्ना अभिमत प्रकट गर्ने थलो भएको बताए । उनले विचारमा खुला र स्पष्टता नभएसम्म सफलता प्राप्त हुन नसक्ने भन्दै उपयुक्त सोचका लागि विभिन्न विचार मन्थन गरी निचोडमा पुग्न अघि बढ्नुपर्नेमा जोड दिए ।

अध्यक्ष मुक्तिप्रसाद सुवेदीले आफ्ना कार्याकालमा भए गरेका कार्यक्रमबारे जानकारी गराएका थिए ।

गण्डकी प्रदेश सदस्य जीवलाल काफ्लेले समाजका बारेमा जानकारी गराए । समाजका अध्यक्ष मुक्तिप्रसाद सुवेदीको अध्यक्षतामा भएको कार्यक्रम सञ्चालन सचिव सीता गौडेलले गरेकी थिइन् ।

विसं २०५२ सालमा वासुदेवचन्द्र मल्लले प्रजातान्त्रिक विचार समाजको स्थापना गरेका हुन । स्थापनाअघि मल्ल त्रिभुवन विश्वविद्यालयका उपकुलपति र चीनका लागि राजदूतसमेत भइसकेका थिए ।