पोखरा । सत्ता गठबन्धनलाई आवश्यकता आधारमा साथ लिने वा छोड्ने अधिकार तल्लो निकायलाई छ । यसको मतलव वडाले आवश्यकता नठाने चुनावी गठबन्धन नहुन पनि सक्छ ।

नेपाली कांग्रेसले बिहीबार मतभार र प्रभावका आधारमा सत्ता गठबन्धनका दलहरुसँग मिलाप गर्न छुट दिएको छ । कास्कीमा गठबन्धन बैठक नियमित बसिरहेको छ । गठबन्धनका अरु दलहरुले अस्वभाविक माग राखेर कांग्रेससँग ‘बार्गेनिङ’ गरेको भन्दै कास्की कांग्रेस रुष्ट बनेको छ । शनिबारको बैठकबाट निस्केपछि सचिव भानु ढकालले भने, ‘मेयर छोडेर गठबन्धन हुँदैन । माथिबाट लाद्ने प्रयास भए हामी गठबन्धन तोडेर जान्छौं ।’ उनले अरु पार्टीसँग कास्कीका कुनै पनि पालिका जित्ने जनाधार नभएको भन्दै कांग्रेसले नेतृत्व नछोड्ने बताए ।

‘पाँच वटै पालिकाको प्रमुख पद कांग्रेसको हो । वडामा पनि हामी नेतृत्व छोड्दैनौं,’ उनी भन्छन्, ‘यसरी मिल्दैन भने गठबन्धन आवश्यक छैन । हामी आफ्नो निर्णय गरेर अघि बढ्छौं ।’ आइतबारसम्म पोखरा महानगर र मादी गाउँपालिकाको उम्मेदवार सिफारिस हुनेछन् भने सोमबार बाँकी ३ गाउँपालिकाका उम्मेदवारको सिफारिस हुने ढकालले बताए । जिल्ला कार्यसमितिले सबैलाई वडादेखि पालिकासम्मको नाम सिफारिस गर्न निर्देशन दिएको उनले जानकारी दिए ।

जिल्ला सभापति किशोरदत्त बराल गठबन्धनको निर्णय हुँदासम्म ढिलो हुने भएकोले सिफारिसको बाटो फुकाएको बताउँछन् । ‘यता निर्णय गरेर नाम माग्दा अबेर हुने भयो । त्यसैले नाम चाहिं पठाउनू भनेका छौं,’ उनले भने, ‘भोलि गठबन्धन भएका ठाउँमा सजिलै छोड्ने गरी नाम सिफारिस हुन्छ ।’ उनले गठबन्धन र सिफारिस सँगसँगै अघि बढ्ने बताए ।

‘पाँच वटै पालिकाको प्रमुख पद कांग्रेसको हो । वडामा पनि हामी नेतृत्व छोड्दैनौं’

पाँचदलीय गठबन्धनले कास्कीका पालिका र वडाको विभाजन शनिबार नै सिध्याउने गरी निर्णायक बैठक राखेको थियो । उक्त बैठकमा पनि सबै दलको आ–आफ्नै दाबी दोहोरिएपछि निष्कर्ष निस्किएन । अरु दलहरु पोखरा महानगर र ४ वटा गाउँपालिकाको निर्णय एकै पटक हुनुपर्ने अडानमा छन् भने कांग्रेसले अरु पालिका सकेर महानगर केन्द्रलाई जिम्मा दिन प्रस्ताव गरेको छ । स्रोतका अनुसार मादी गाउँपालिकाको अध्यक्षमा माओवादीको दाबी छ । एकीकृत समाजवादीले माछापुच्छ्रे गाउँपालिका खोजेको छ भने जनता समाजवादीले अन्नपूर्ण गाउँपालिका खोजेको छ । तर कांग्रेसले सबैलाई उपाध्यक्ष दिएर नेतृत्व आफैसँग राख्ने दाउ गरेको छ ।

आइतबार निर्णायक वार्ता हुने गबठन्धन दलहरुको भनाइ छ । शनिबारको बैठकले पोखरा महानगरपालिकाबाहेक कास्कीका ४ गाउँपालिका र ७२ वटै वडाको भागबण्डा आइतबार लगाउने निर्णय गरेको हो । आइतबार साँझ ४ बजे अर्को बैठक बोलाइएको छ । कास्कीका सबै पालिकामा पार्टीको मतभार र संगठनको अवस्थाबारे प्रतिवेदन तयार गर्न कांग्रेस सचिव भानु ढकालसहित माओवादी कास्की संयोजक बखानसिंह तमु र एकीकृत समाजवादीका जिल्ला अध्यक्ष धनराज आचार्यले जिम्मा पाएका छन् । आइतबारको बैठकमा उक्त प्रतिवेदन पेस गरेपछि सन्तुलन आधारमा गठबन्धनको मोडालिटी बनाइने उनीहरुको भनाइ छ ।

‘आइतबारको बैठकबाट एउटा आधिकारिक खाका बन्छ । कुन पालिकामा कसलाई पठाउने भन्ने निर्णय हुन्छ,’ उनले भने, ‘यो चुनाव पार्टीहरुको चुनाव भएन । अहिले जो उठे पनि गठबन्धनको उम्मेदवार हो । त्यसमा हामी सहमत छौं ।’ अध्यक्ष वा उपाध्यक्ष सबै पार्टीलाई अनुपात हिसाबमा भाग लगाउने आचार्यले बताए । २०७४ को स्थानीय चुनावमा कास्की एमालेको दबदबा देखिन्छ । कांग्रेसले अन्नपूर्ण गाउँपालिकासहित २४ वडा जितेको थियो भने माओवादीले ३ वटा वडामात्रै जितेको छ । बाँकी सबै पालिका र वडाको चुनाव एमालेले जितेको हो । माओवादी कास्की संयोजक बखानसिंह तमु धरातलमा रहेर छलफल नहुँदा निकै समस्या आएको बताउँछन् । ‘अघिल्लो चुनावको नतिजा हेर्दा कांग्रेस एमालेपछिको दल हो । माओवादी कांग्रेसभन्दा अलि धेरै नै फरक मतसहित तेस्रो भएको हो,’ उनले भने, ‘एस (एकीकृत समाजवादी) को पुरानो मत केलाउने ठाउँ छैन । त्यसैले यही अनुपातमा मिलाउनुपर्छ । नत्र गठबन्धन मजबुत हुँदैन । रिजल्ट निस्किंदैन ।’ आइतबार सकेसम्म सबै सक्ने र नभए सोमबारसम्म निष्कर्ष निकाल्ने उनी बताउँछन् ।