पोखरा । युनाइटेड क्लब आयोजनामा रामेश्वरी माविका छात्रालाई सेनेटरी प्याड वितरण गरिएको छ । क्लबको १२ औं वार्षिकोत्सव अवसरमा आयोजित साताव्यापी कार्यक्रमअन्तर्गत शुक्रबार मझेरीपाटनको रामेश्वरीका छात्रालाई सेनेटरी प्याड वितरण गरिएको हो ।

रामेश्वरीका प्रअ पूर्णदेव सुवेदीले सेनेटरी प्याड सहयोग गरेकोमा धन्यवाद व्यक्त गर्दै राज्यले गर्नुपर्ने काम सामाजिक संस्थाले गरिरहेको समेत बताइन् ।

विद्यालयका सहप्रअ दिलसुवा गुरुङले युनाइटेड क्लब जस्ता सामाजिक संस्थाले गरेको सहयोगका कारण विद्यार्थीलाई विद्यालयमा पठनपाठनमा खुला र सहज बनाउन मद्दत पुग्ने बताइन् ।

क्लब संस्थापक अध्यक्ष हिमालय बख्रेलले वार्षिकोत्सवमा एक सातासम्म सामाजिक कामलाई निरन्तरता दिने बताए ।

क्लब अध्यक्ष राजु श्रेष्ठको अध्यक्षतामा सम्पन्न कार्यक्रममा द्वितीय उपाध्यक्ष गणेश तिमिल्सिनाले स्वागत र सदस्य तथा कार्यक्रम संयोजक सीमा गुरुङले धन्यवाद मन्तब्य राखेकी थिइन् । कार्यक्रम सञ्चालन क्लबका सचिव दिनेश सुनारले गरेका थिए ।