पोखरा । फेवातालमा जलजन्य विपत उद्घारमा खटिने नेपाली सेनाका जवान बस्न नेपाली सेनाले सेटघर निर्माण सुरु गरेको छ ।

मध्यकमाण्ड हेडक्वार्टरका कमान्डपति उपरथि बाबुराम श्रेष्ठले सो घरको शिल्यान्यास गर्दै यसको महत्वबारे प्रकाश पारे । उनले पोखरा घुम्नेहरुको आवश्यकतालाई मध्यनजर गरी सो घर निर्माण अनिवार्य भएको बताए ।

निर्माणााधीन सेटघर रत्न मन्दिर परिसर र बाराहीघाट नजिक रहेको छ । करिब ३२ लाखको लागत अनुमान गरिए पनि नेपाली सेनाले श्रमदानले आधा रकम कम हुनेछ । घर निर्माणका लागि कुनै लिखित बजेट नभए पनि विभिन्न संघसंस्थाले केही सहयोग गर्ने भएका छन् । होङ्सी सिमेन्टले ३ सय बोरा सिमेन्ट सहयोग गरिसकेको छ भने गण्डकी सरकार, पोखरा महानगर, कास्की जिल्ला हार्डवयर एसोसिएसन लगायतले सहयोगका लागि प्रतिबद्घता जनाएका छन् ।

तालमा हुन सक्ने सम्भावित दुर्घटना न्युनीकरणमा सेनाले उद्घार टोलीलाई ताल किनारमा तैनाथ गर्दै आएको छ । अहिले उद्धार टोली पालभित्र सीमित छ ।

गत चैत ८ मा पोखरा घुम्न आएका २३ जना पर्यटक फेवातालमा आएको छालका कारण फँसेका थिए । त्यसबेला तत्काल उद्धार हुँदा उनीहरु सकुशल भएका थिए । तालमा डुबेकाहरुको नियमितरुपमा उद्घार हुँदै गर्दै आएको र मानव जीवन रक्षामा सघाउ पुगेको मध्यकमाण्डका सूचना अधिकृत प्रमुख सेनानी प्रेमप्रसाद पौडेलले बताए ।