पोखरा । पोखरा २२, पुम्दीकोटमा निर्माण गरिएको विशाल शिव मूर्ति परिसरमा आयोजना हुने शिवमहापुराण एवं धार्मिक पर्यटन महोत्सव–२०७९ को तयारी पूरा भएको छ ।

वैशाख ४ देखि १२ सम्म संचालन हुने महोत्सवबाट संकलित रकमले यहाँको बाँकी निर्माणकार्य सम्पन्न गर्ने र ३ करोड ७५ लाख रुपैयाँ ऋण तिर्ने योजना रहेको शुक्रबार पुम्दीकोटमा आयोजित पत्रकार सम्मेलनमा जानकारी दिइयो । आयोजक पुम्दीकोट विकास समिति तथा महायज्ञ मूल समिति अध्यक्ष चन्द्रकान्त बरालले २० करोड लागत अनुमान गरिएको परियोजना विस्तारित भई ४० करोड रुपैयाँको पुगेको र उल्लेखित २० करोड रुपयाँ खर्च भई ऋण लागेको जानकारी दिए ।

महोत्सवबाट ६ करोड रुपैयाँ संकलन गर्ने लक्ष्य समितिको रहेको उनले बताए । कार्यक्रमका लागि ७० लाख रुपैयाँ खर्च अनुमान गरिएको छ । हालसम्म ५१ फिट अग्लो महादेव मूर्ति, ३१ फिट अग्लो विशाल डमरु, गंगापोखरी, १०८ स्वर्गद्वारी सिंढी, १०८ धारा जडित तेस्रो आँखा, २१६ शिवलिंग, शिवताण्डव नृत्य हल र ध्यान केन्द्र निर्माण भइसकेका छन् । यसैगरी, मोनोरेलबाट गणेश परिक्रमा, फूलमाला बिक्रीका लागि ४१ सटर, कम्पाउन्ड वाल, २ सय मिटर पहुँच मार्ग र प्रशासकीय भवन पनि निर्माण गरिएको छ ।

महोत्सवबाट ६ करोड रुपैयाँ संकलन गर्ने आयोजकको लक्ष्य छ

महोत्सव उद्घाटन अवसरमा विशाल महादेव मूर्ति पनि उद्घाटन गर्ने कार्यक्रम रहेको समिति उपाध्यक्ष हिमलाल बरालले जानकारी दिए । जगतगुरु शंकराचार्य नरेन्द्रनन्द सरस्वती महाराजबाट सो उद्घाटन सम्पन्न हुने छ । उनी उत्तर प्रदेशस्थित काशी सुमेरुका पीठाधेश्वर हुन् । महोत्सव अवसरमा आयोजना हुने महायज्ञमा विराट धनधान्य महापर्व, संगीतमय भजनकीर्तन, कलश यात्रा, ग्रहशान्ति, भूमि दान, कर्ता बस्ने, तुलादान र लाख बत्ती बाल्ने जस्ता कार्यक्रम समेटिने छन् । यसैगरी प्रत्येक दिन बिहान ७ देखि ८ बजेसम्म पाठपारायण र १० देखि ४ बजेसम्म कथा प्रवचन झाँकी आयोजना गरिने छ । छोरेपाटनदेखि पुम्दिकोट पुग्न निशुल्क बसको व्यवस्था समेत गरिएको समितिले जनाएको छ ।

सहयोगदातालाई गरिने सम्मानका प्रावधान समेत समितिले सार्वजनिक गरिसकेको छ । महायज्ञमा भागवत्भाष्कर कमलनयन गौतमले कथा वाचन गर्ने छन् । महोत्सव सम्पन्न गर्न १००८ सदस्य रहेको मूल आयोजक समिति र ३८ विभिन्न उपसमिति गठन गरिएको छ ।

समृद्धि, विकास र रोजगारीको दीर्घकालीन लक्ष्यसहित आयोजित महोत्सवले ऐतिहासिक एवं धार्मिक महत्वको पुम्दीभुम्दी क्षेत्रमा धार्मिक पर्यटन प्रवद्र्धन गर्ने उद्देश्य बोकेको छ । पुम्दीकोट क्षेत्रलाई भूमेश्वर कैलाशधामरुपमा विकास गर्ने मुख्य योजना समितिको रहेको छ । ५ वर्ष अगाडि २०७३ फागुन ३ देखि १३ सम्म पनि उक्त स्थानमा शिव महापुराण तथा ज्ञानमहायज्ञ एवं धार्मिक पर्यटन महोत्सव–२०७३ आयोजना गरिएको थियो । सो अवसरमा करिब २० रोपनी जग्गा र ६ करोड २८ लाख रुपैयाँ दान प्राप्त भएको थियो ।

समिति अध्यक्ष चन्द्रकान्त बरालले विस्तारित परियोजनाअन्तर्गत अब नजिकैको अर्को डाँडोलाई सुमेरु पर्वत घोषणा गरी कुमार र पार्वतीको मूर्ति स्थापना गर्ने, भूमेश्वर महादेवदेखि सुमेरु पर्वतसम्म विद्युतीय चेयरकार निर्माण गर्ने, हरियाली पार्क स्थापना र पार्किङस्थलको व्यवस्था गर्ने जस्ता योजना रहेको जानकारी दिए ।