पोखरा । २२ वर्ष अघि नेपाल रेडक्रस सोसाइटीले पोखराको अर्मलामा खानेपानी परियोजना निर्माण गरिदियो । दैनिक जनसंख्या बढ्दै गयो, उपभोक्ता बढ्दै गए । तर अहिलेसम्म उक्त आयोजना स्तरोन्नती भएन । गाउँलेहरु खोलाको पानी पिउन बाध्य भए । पानी नपाएर काकाकुल बनेका केवरेका स्थानीयलाई नयाँ वर्षको अवसरमा घरघरै खानेपानीको धारा कोशेली दिईएको छ । कर्मफ्लाईटस् फाउन्डेशनले जर्मनीको टुएड अर्गनाइजेसनको सहयोगमा १८ घरधुरीलाई एक घर एक धारा परियोजना निर्माण गरिदिएको हो ।

पोखरा महानगरपालिकाको समेत आर्थिक साझेदारीमा २५ लाख भन्दा बढी लागतमा खानेपानीको व्यवस्था गरिएको हो । परियोजनामा महानगरको ५ लाख, कर्मफ्लाईटस्को १३ लाख र स्थानीयको ७ लाख ८० हजार संकलन भएको वडा नम्बर १६ का अध्यक्ष जीवन आचार्यले जानकारी दिए । परियोजनाका डिजाइनर कालिदास सापकोटाले केवरे बासीको तत्कालको समस्या समाधान भएपनि परियोजनालाई दिगो रुपमा सञ्चालन गर्न मर्मत संभार कोषको व्यवस्था आवश्यक रहेको बताए ।

कर्मफ्लाईटस् फाउण्डेशनका कार्यक्रम निर्देशक प्रेमबहादुर कुँवरले गएको पुस २८ गते परियोजना सम्झौता भएर ३ महिनामै काम सम्पन्न गर्न पाएकोमा खुशी ब्यक्त गरे । उनले खानेपानी दिगो रुपमा सञ्चालन गर्न मर्मत सम्भार कोष निर्माण गर्ने प्रतिबद्धता जनाए । सानो स्केलको परियोजना भएपनि ‘ग्राभिटी फ्लो’ र ‘लिफ्टिङ सिष्टम’ दुवै प्रयोग गरिएको योजनामा २ वटा इन्टेक छ । त्यहाँ ३ वटा आरविटी पानी संकलन टंकी, एउटा पम्प हाउस र २१ वटा धारा जडान गरिएको परियोजनाका सामुदायिक प्राविधिक गोपीलाल तिमिल्सिनाले जानकारी दिए । परियोजना स्थानीयलाई हस्तान्तरण गरिएको छ ।