पोखरा । नेकपा एमालेभित्र महानगरको मेयर र उपमेयरका उम्मेद्वार सर्वसम्मत छान्न नसकेपछि मतदानमा जाने भएको छ । एमालेले शुक्रबार मतदानको कार्यक्रम राखेको छ । एमाले पोखराको सचिवालय बैठकले निर्वाचन मण्डल गठन गरेको छ । एमाले निकट अधिबक्ताहरु कमल अर्याल, जुना गुरुङ, भगवती पहारी र यामबहादुर खत्री सम्मिलित निर्वाचन मण्डल बनाईएको हो । निर्वाचन मण्डलले निर्वाचनको लागि मतदाता नामावली प्रकाशन गरिसकेको छ भने शुक्रबार विहान मनोनयनको कार्यक्रम छ । यसअघि मंगलबार आकांक्षीको नाम टिपिएपनि पुनः नयाँ प्रक्रियाबाट मनोनयन गर्न लागिएको हो ।

मेयरमा १२ जनाले आकांक्षा देखाएका थिए भने उपमेयरमा ११ जनाको नाम टिपिएको थियो । मेयरमा प्रदेशसभा सदस्य कृष्णबहादुर थापा र राजीव पहारी सहित वडाध्यक्ष लेखबहादुर तामाङ (दर्शन लामा), व्यवसायी पुष्पज्योती ढुङ्गाना, पुष्पराज अधिकारी, महानगरका पुर्व अध्यक्ष दिपक पौडेल, बालासिंह काउचा मगर, सावित्री भण्डारी, मीनाकुमारी गुरुङ, भीमबहादुर कार्की, रश्मी आचार्य र प्राडा विश्वकल्याण पराजुलीले आकांक्षा देखाएका थिए ।

उपमेयरका लागि एमाले कास्कीका उपाध्यक्ष तेजनारायण अधिकारी, सचिव बैनबहादुर अधिकारी क्षेत्री, पत्रकार सुष्मा पौडेल, वडाध्यक्ष शोभामोहन पौडेल र जीवन आचार्य, बामदेव ढुंगाना, टिकाराम पंगेनी, व्यवसायी संजीव बहादुर कोइराला, देवका पहारी (त्रिपाठी), बलराम गायक (गन्दर्भ) र हरिमाया गुरुङले नाम दर्ता गराएका थिए ।

यसअघि मेयरमा १२ र उपमेयरमा ११ जनाले नाम टिपाएपनि पुनः मनोनयन गर्न लागिएको छ ।

आकांक्षीहरुले पुनः मनोनयन गर्नुपर्ने भएपछि पहिले नाम टिपाएका भन्दा बाहिरकाले समेत मनोनयन दर्ता गर्न पाउने छन् । यसअघि उपमेयर मन्जुदेवी गुरुङले कुनैपनि पदमा आकांक्षा देखाएकी छैनन् । एमालेको आन्तरिक बैठकमा बहालवाला सांसदलाई मेयर उपमेयरमा छेक्ने प्रयास भएको छ । ‘अहिले सांसदमै रहेको मान्छे फेरि मेयर र उपमेयरमा आकांक्षा देखाउनु राम्रो त होईन । अरु नेताहरु पनि छन् नि महानगर धान्ने,’ एक नेताले भने, ‘सांसद रोक्ने प्रयास चौतर्फी भएको छ ।’ सांसदहरु विरुद्ध चौतर्फी घेराबन्दी भएको बैठकमा सहभागी ति नेताले बताए । ‘कसैलाई पदैपद, कसैलाई खाली हात हुन हुँदैन,’ उनले भने, ‘कामको आधारमा मुल्यांकन हुनुपर्छ । अवसर पाए जसले पनि महानगर चलाउन सक्छन् ।’

अहिले सांसद कृष्ण थापाले मेयरको टिकट पाउने चर्चा गरिएको छ । अर्का सांसद पहारी पनि निकै रस्साकस्सीमा छन् । यसअघि उपमेयर गुरुङलाई समेत मेयरको आकांक्षीको रुपमा चर्चा गरिएको थियो । तर उनले आकांक्षा देखाईनन् । २०७४ को निर्वाचनमा पनि आन्तरिक प्रतिश्पर्धाबाटै मेयर र उपमेयरको नाम टुंग्याईएको थियो । मानबहादुर जिसीले सबैभन्दा बढी मत ल्याएर मेयरको टिकट पाएका हुन् भने उपमेयरमा प्रभा कोइरालाले धेरै भोट ल्याएपनि भेग र जातीय हिसाव मिलाउनुपर्ने भएकोले दोश्रो नम्बरमा सिफारिस भएकी गुरुङले टिकट पाएकी हुन् । अहिले पनि मतदातबाट मेयरमा ३ र उपमेयरमा ३ जनाको नाम सिफारिस हुनेछ । दुबै पदमा एक महिला र दुई पुरुषको नाम सिफारिस गरिने महानगर कमिटीले जनाएको छ । मेयर र उपमेयरको आन्तरिक चुनावमा १ सय १० जनाले मतदान गर्ने छन् ।