पोखरा । आदर्श समाज दैनिक २७ औं वर्षमा प्रवेश गरेको छ । २०५३ साल वैशाख १ मा पाक्षिक पत्रिकाबाट प्रकाशन आरम्भ गरेको आदर्श समाजले स्थापनाको २६ औं वार्षिकोत्सव मनाएको हो । बिहीबार न्यूरोड स्थित कर्पोरेट कार्यालयमा विशेष कार्यक्रम गरी स्थापना दिवस मनाइएको हो ।

आदर्श समाज बहुमुखी प्रकाशन प्रालिका अध्यक्ष एवं पत्रिकाका प्रधान सम्पादक कृष्णप्रसाद बास्तोलाले पत्रिका यहाँसम्म आइपुग्न सहयोग गर्ने सबै कर्मचारी, पाठक, विज्ञापनदाता, शुभचिन्तकलाई धन्यवाद दिए । उनले विगत स्मरण गर्दै आदर्श समाज सधैं देशको समृद्धिका लागि स्वतन्त्र पत्रकारितामा कटिबद्ध रहेको बताए ।

पत्रिकाका सम्पादक भरत कोइरालाले आदर्श समाजलाई छापासहित सयमक्रम अनुसार परिस्कृत गर्दै लगिने प्रतिवद्धता जनाए । राज्यलाई सहि दिशा दिन सञ्चार माध्यमको भूमिका महत्वपूर्ण रहेकाले आफ्नो टीम त्यसैमा कटिबद्ध रहने उनले बताए । आदर्श समाजका स्थापनाकालिन सदस्य शिरोमणी बरालले पोखराको पत्रकारितामा आदर्श समाज एक धरोहर भएको बताए ।

गण्डकीबाट प्रकाशित दैनिक पत्रिकामध्ये आदर्श समाज ‘क’ वर्गमा सूचिकरण हुने एकमात्र राष्ट्रिय दैनिक हो । प्रेस काउन्सिल नेपालले आर्थिक वर्ष २०७६/७७ को पत्रपत्रिका वर्गीकरण तथा मूल्यांकन नतिजामा राष्ट्रिक ‘क’ मा सूचीकरण हुनेमा आदर्श समाज गण्डकीकै एकमात्र दैनिक बनेको थियो ।