गण्डकी प्रदेशको एकमात्र राष्ट्रिय दैनिक आदर्श समाज २७ औं वर्षमा प्रवेश गरेको छ । यस अवसरमा आदर्श समाज बहुमुखी प्रकाशन प्रालिका तर्फबाट पाठक, बिक्रेता, विज्ञापनदाता, विज्ञापन एजेन्सी, यस कम्पनीका सम्पूर्ण कर्मचारी, शुभेच्छुक संघसंस्था एवं सम्पूर्ण महानुभावलाई हार्दिक शुभकामना व्यक्त गर्दछौं । मुलकमा सशस्त्र द्वन्द्वको राँको दन्किरहेका बेला २६ वर्ष अगाडि अर्थात् २०५३ वैशाख १ मा यस पत्रिकाले प्रकाशनको यात्रा प्रारम्भ गरेको थियो । एकातिर द्वन्द्वको मार अनि अर्कोतिर साँधुरो आर्थिक गतिविधि, यी चुनौतीबीच पनि हामीले आँट गर्‍यौं कि नागरिकको सुसूचित हुने अधिकारलाई प्रत्याभूत गर्नुपर्छ भनेर ।

विगत फर्केर हेर्ने हो भने कहाली लाग्छ । तैपनि निरन्तरको प्रयास र आमपाठक अनि शुभेच्छुकहरुको शुभेच्छाले हामी अहिले यो अवस्थामा आइपुगेका छौं । पाक्षिक पत्रिकाबाट सुरु भएको हाम्रो यात्रा साप्ताहिक हुँदै २०५४ माघ १९ (श्रीपञ्चमी) बाट दैनिक रुपमा आदर्श समाज निरन्तर प्रकाशित हुँदै आएको छ । यस अवधिमा विभिन्नखाले राजनीतिक परिवर्तनका लागि नागरिक स्वतन्त्रताका पक्षमा अविचलित रुपमा आवाज सशक्त पार्दै सूचना प्रवाहलाई हामीले उच्च प्राथमिकतामा राखेको कतैबाट छिपेको छैन । पहिला पोखरालाई मात्र आधार मानेर सुरु भएको हाम्रो यात्रा फराकिलो पार्नुपर्छ भनेर २०५७ साउन ७ मा वेब मेसिनबाट प्रकाशन सुरु गर्‍यौं । अनि २०५८ माघ १७ बाट नवलपरासीको गैंडाकोटबाट तराई संस्करणको प्रकाशन थाल्यौं । चरम राजनीतिक खिचातानी अनि दुर्बल आर्थिक अवस्थाको मार खेप्दै पत्रिकाले तराईको यात्रालाई निरन्तरता दिन सकेन ।

जटिल परिवेशमा पनि सत्यतथ्य समाचार, विश्लेषण अनि सूचना प्रवाहमा हामी निरन्तर क्रियाशील छौं । निश्पक्षता हाम्रो पहिलो शर्त हो । मुलुक अहिले संघीय गणतान्त्रिक शासन व्यवस्थामा छ । संघीयतालाई सुदृढ पार्दै नागरिक हक सुुनिश्चितताका लागि हामी कहिल्यै सम्झौता गर्ने छैनौं । राजनीतिक परिवर्तन भएर मुलुक आर्थिक समृद्धिको बाटोमा लम्किने बेला हो यो । तर नागरिकको अपेक्षा अनुसार दलहरुले कार्यसम्पादन गर्न सकेका छैनन् । मिडियाको पाटोमा हेर्ने हो भने पनि त्यसको असर परिरहेको छ । यी चुनौती छिचोल्दै पत्रकार र पत्रकारिता जगतले अगाडि बढ्नुपर्ने अवस्था छ । डिजिटल प्रविधिको विकासलाई पछ्याउँदै छापा पत्रिकासँगै आदर्श समाजको अनलाइन पत्रिका पनि प्रकाशित गरिएको छ । युग सुहाउँदो प्रविधि अनुसरण गरी नागरिकमा सूचना पुर्‍याउने काममा हामी अविचलित रुपमा लागिरहनेछौं । नववर्ष २०७९ को शुभकामना ।