पोखरा । अखिल नेपाल फुटबल संघ (एन्फा) कास्कीको आयोजनामा पोखरा रंगशालामा जारी सावित्री निर्माण सेवा कास्की लिगमा भ्याली स्पोर्टस् क्बल, हेमजा युनाइटेड क्लब र शीतल ज्योति युवा क्लब सेमिफाइनलमा प्रवेश गरेको छ ।

खेल संयोजक नरप्रसाद गुरुङका अनुसार रंगशालामा मंगलबार भएको पहिलो खेलमा भ्याली स्पोर्टस् क्लबले ड्यामसाइड क्लबलाई २–० गोल अन्तरले पराजित गर्दै अन्तिम चारमा प्रवेश गर्‍यो ।

दोस्रो खेलमा हेमजा युनाइटेड क्लबले सत्य युवा क्लबलाई ४–१ गोलको फराकिलो अन्तरले पाखा लगायो । यसैगरी अन्तिम खेलमा शीतल ज्योति युवा क्लबले नव आदर्श क्लबमाथि २–१ गोल अन्तरले संघर्षपूर्ण जीत निकाल्दै सेमीमा भ्यालीसँगको भेट पक्का गर्‍यो ।

क्वाटरफाइनलको अन्तिम खेल एलजी एसोसियसन र विष्णु पादुका क्लबबीचको खेल भोलि (बुधबार ) सञ्चालन गरिने संयोजक गुरुङले जानकारी दिए । उनकाअनुसार सेमिफाइनलको पहिलो खेल भ्याली स्पोर्टस् क्बल र शीतल ज्योति युवा क्लबबीच हुनेछ । दोस्रो सेमीफाइनल खेल हेमजा युनाइटेड क्बल र अन्तिम क्वाटरफाइनल खेलको विजेता टिमबीच हुनेछ । फाइनल खेल आगामी बिहीबार हुने एन्फा कास्कीले जनाएको छ ।