पोखरा । गण्डकीलाई आर्थिक वर्ष २०७८/०७९ भित्र उज्यालो गण्डकी प्रदेश घोषणा गर्ने तयारी थालिएको छ । ऊर्जा, जलस्रोत तथा खानेपानी मन्त्रालयले दोस्रो चौमासिक प्रगति सार्वजनिक गर्दै मन्त्रालय प्रदेशलाई उज्यालो प्रदेश घोषणा गर्ने गरी अघि बढेको जानकारी दिएको छ ।

मन्त्री हरिशरण आचार्यले प्रदेशका सम्पूर्ण घरधुरीमा कुन न कुनै किसिमको विद्युत सुविधाको पहुँच पुर्‍याई यही आर्थिक वर्षभित्र उज्यालो प्रदेश घोषणा गर्ने बताए । प्रदेशमा हालसम्म नवीकरणीय ऊर्जामार्फत ६.४६ प्रतिशत र रािष्ट्रय विद्युत प्रसारण लाइनमार्फत ९२.७९ गरी ९९.२५ प्रतिशत घरधुरी विद्युतको पहुँचमा पुगेको उनको भनाइ थियो । ‘ढोरपाटन नगरपालिकाको ६ नम्वर वडा, नवलपुरको बौदीकाली, हुप्सेकोट र बुलिङटार गाउँपालिकाको केही स्थानमा विद्युतको पहुँच पुगेको छैन,’ उनले भने, ‘बोधा पोखरी सवस्टेसन बन्न ढिलाइ भएका कारण पनि समस्या भएको हो । २ वर्षदेखि काम नगरेको ठेकेदारलाई सम्पर्कमा ल्याएर काम सुरु गरेका छौं ।’

मन्त्रालयले खानेपानीतर्फ पनि काम उल्लेखनीय काम गरेको बताए । प्रदेशभर १ हजार ८१ खानेपानी योजना रहेकोमा १ हजार ५३ योजनामा कार्यान्वयनमा गइसकेको उनको भनाइ छ । प्रदेशभर अहिलेसम्म ९२ हजार २ सय १९ धारा जडान गरी ४ लाख ७२ हजार १ सय ९३ जना नागरिक खानेपानीको पहँुचमा पुगेको उनले जानकारी गराए । ‘प्रदेशमा अहिले १५ प्रतिशत जनताले मात्र प्रशोधित पानी पिएका छन्,’ उनले भने, ‘हामीले अहिले शुद्ध पानीभन्दा पनि आधारभूत खानेपानीमा ध्यान दिएका छौं । आधारभूत खानेपानी पूरा भएपछि शुद्ध खानेपानीतर्फ योजना ल्याउँछौं ।’

मन्त्रालयले नदी नियन्त्रण, सिंचाइसँगै जनतासँग मन्त्री, समस्या समाधानका लागि मन्त्रालय अभियान नियमित चलाइरहेको उनको भनाइ थियो । मन्त्रालयले दोस्रो चौमासिकसम्म ६३.२० प्रतिशत भौतिक प्रगति र ३१.७७ प्रतिशत वित्तीय प्रगति गरेको उनले सुनाए । विविध कारणले मन्त्रालयको भौतिकभन्दा वित्तीय प्रगति कम भएको मन्त्री आचार्यले बताए ।