पोखरा । नेपाल बार एसोसिएसनको अध्यक्षमा वरिष्ठ अधिवक्ता गोपालकृष्ण घिमिरे निर्वाचित भएका छन् । यस्तै, गण्डकी प्रदेशबाट उपाध्यक्षमा पोखराका अधिवक्ता वीरेन्द्र केसी निर्वाचित भए ।

सत्ता गठबन्धनमा आबद्ध दलहरू निकट कानुन व्यवसायीहरूको संयुक्त प्यानलबाट उम्मेदवारी दिएका घिमिरेले करिब २ हजार मतान्तरसहित निर्वाचित भएका हुन् । उनी नेपाली कांग्रेसनिकट डेमोक्रेटिक लयर्स एसोसिएसनका पूर्व अध्यक्ष हुन् ।

बारको चुनावमा गण्डकी प्रदेशबाट उपाध्यक्षमा निर्वाचित वीरेन्द्र केसी लोकतान्त्रिक, प्रगतिशील, समावेशी, पेसागत कानुन व्यवसायी समूहका हुन् । केसीले भूपेन्द्र खनाललाई झण्डै १६ सय मतअन्तरले पराजित गरेका हुन् । निर्वाचित केसीले कुल खसेको मतमा ४ हजार २ सय ४८ मत प्राप्त गरेका छन् ।

उच्च अदालत बार एसोसिएसन पोखराका सदस्य केसी विगतमा पुनरावेदन बार एसोसिएसनमा विष्णुकुशल भुजेलको पालामा कोषाध्यक्ष भइ काम गरेका थिए । उनी पोखरा विश्वविद्यालयलगायत विभिन्न संघसंस्थामा कानुनी सल्लाहकार छन् ।

पोखराको भलामका ५१ वर्षीय केसी हाल बगर बस्छन् । उनी तीन दशकदेखि कानुन व्यवसायमा संलग्न छन् । गृहनगर (पाेखरा) मा बारको चुनावअन्तर्गत ३ सय ९५ मत खसेकोमा उनको पक्षमा २ सय ४४ मत परेको थियो।