लेखनाथ । आँखाको ज्योति गुमेका तथा न्युनदृष्टि भएका समुदायको हकहितका लागि काम गर्दै आएको कास्की नेत्रहीन संघले बिहीबारदेखि साताव्यापी स्थापना दिवस मनाउन थालेको छ ।

सो कार्यक्रमको शुभारम्भ गर्दै पूर्व गृहमन्त्री खगराज अधिकारीले शारीरिकरुपमा कमजोरी भए पनि ज्ञान, क्षमता र सीपले मात्र मानिसलाई अगाडि बढाउने भएकाले आफूलाई कमजोर नसम्झी उच्च आत्मबल साथ अगाडि बढ्न आग्रह गरेका थिए ।

शारीरिकरुपमा सांग भए पनि विचारले अपांग भएकालाई कहिल्यै पनि सुधार्न नसकिने तर्क गर्दै नेता अधीकारीले आफूलाई कमजोर नसोची जीविकोपार्जनमा लाग्न सुझाव दिए ।

सोही अवसरमा दृष्टिविहीन अपांगता भएका व्यक्तिको आयआर्जनमा सहयोग पुग्ने गरी सिबिआरको आर्थिक सहयोगमा २५ जनालाई कुखुराका चल्ला, दाना र औषधी वितरण गरिएको थियो भने ६० जनालाई सेतो छडीसमेत वितरण गरिएको थियो ।

साथै, दृष्टिविहीनलाई सेतोछडीबाट सहज रुपमा हिंडडुल गर्न सहिजोहोस् भनी नेपालमा नै पहिलो पटक २ सय मिटरको सेतोछडी दौड प्रतियोगिताको आयोजना गरिएको थियो । जसमा पसबहादुर गुरुङ प्रथम, अपेक्षा पोखरेल दोस्रो, बिसु तामाङ तेस्रो र उमनाथ अधिकारी तथा प्रमोद दाहाल सान्त्वना भए ।

कास्की नेत्रहीन संघ अध्यक्ष श्रीकान्त सापकोटाको अध्यक्षतामा भएको कार्यक्रममा संघका केन्द्रीय महासचिव शिशिर खनाल, सचिव कुशलराज पौडेल र सहसचिव सुनिल ज्ञवाली लगायतले बोलेका थिए ।