पोखरा । बलात्कार अभियोगको मुद्दा खेपिरहेका अभिनेता पल शाहलाई पुर्पक्षका लागि थुनामा पठाउन नवलपुर जिल्ला अदाललते आदेश दिएको छ । यसअघि शाहलाई तनहुँ जिल्ला अदालतले पनि थुनछेक बहसपछि यस्तै फैसला सुनाएको थियो ।

बुधबार न्यायाधीश अर्जुन अधिकारीको इजलासले शाहलाई तनहुँमै थुनामा राख्न आदेश दिएको हो । शाहलाई बुधबार राति नै तनहुँ पठाइएको छ । वैशाख ७ गते पुनः जिल्ला अदालत पूर्वी नवलपरासीमा हाजिर हुन भनिएको छ ।

यसैबीच, पल शाहले उच्च अदालत पोखरामा तनहुँ जिल्ला अदालतले गरेको फैसलाविरुद्ध तारेखमा राख्न माग गर्दै निवेदन दिएका थिए ।

मुलुकी अपराध संहिता, २०७४ अनुसार १४ देखि १६ वर्षकी किशोरीलाई बलात्कारको अभियोग पुष्टि भए १२ देखि १४ वर्ष कैद सजाय हुने कानुनी व्यवस्था छ । पीडित भनिएकी किशोरीले ४ लाख नगद र अन्य क्षतिपूर्ति पाउनुपर्ने माग गरेकी छन् ।

गत फागुन ११ मा नावालिग किशोरीले विवाहको प्रलोभन देखाइ अभिनेता पल शाहले पटक पटक करणी गरेको भनी जिल्ला प्रहरी कार्यालय तनहुँमा उजुरी दिएकी थिइन् । त्यसको एक साता नबित्दै उनले नवलपुरमा पनि अर्को उजुरी दर्ता गर्दाले पलले दोहोरो मुद्दा खेपिरहेका छन् । तर दुवै अदालतले सजाय हुने फैसला सुनाए दोहोरो सजाय भोग्नु पर्दैन।