म्याग्दी । रघुगंगा गाउँपालिकाको १२ औं गाउँसभाबाट करिब एक दर्जन ऐन, कार्यविधि र नियमावली पारित भएको छ । मंगलबार गाउँसभाले केही योजना संशोधन र विनियोजनसहित विभिन्न ऐन, कार्यविधि र नियमावलीहरु पारित गरेको हो ।

विद्यायन समिति संयोजक मनकुमार शेरपुञ्जाले प्रस्तुत गरेको ऐन, कार्यविधि र नियमावलीहरुलाई छलफलसहित सर्वसम्मत रुपमा पारित गरिएको थियो । सभाले २ वटा ऐन पारित गरेको छ । खानेपानी सरसफाइ तथा स्वच्छतासम्बन्धी ऐन– २०७८ र पालिका प्रहरी ऐन–२०७८ पारित भएको गाउँपालिकाका प्रमुख प्रशासकीय अधिकृत अमृत सुवेदीले जानकारी दिए ।

खानेपानीसम्बन्धी ऐनमा खानेपानीको मुहानको प्राथमिकता तोकिएको छ । गाउँपालिकाभित्र रहेका खानेपानीका मुहानहरुमा सबैभन्दा पहिलो खानेपानी र त्यसपछि सिंचाइलाई प्राथमिकता निर्धारण गरिएको छ । उक्त ऐनअनुसार खानेपानी उपभोक्ता संस्था स्थापना हुने बाटो खुलेको छ भने फोहोर व्यवस्थापनको लागि नीतिगत प्रबन्ध भएको छ ।

पालिका प्रहरी ऐनले गाउँपालिकाको सार्वजनिक संरक्षण, विपद् व्यवस्थापन, न्यायिक समितिको फैसला कार्यान्वयन र समाजका विकृति, विसंगतिको नियन्त्रणका लागि नियमावली बनाएर पालिका प्रहरी भर्ना गर्न सक्ने बाटो खुलेको छ । सभाले न्यायिक समितिको कारबाहीलाई किनारा लगाउँदा अपनाउनुपर्ने कार्यविधि सम्बन्धमा व्यवस्था गर्न बनेको ऐन, २०७५ र खरिद नियमावली, २०७५ लाई समेत संशोधन गरेको छ ।

गाउँसभाले केही योजना संशोधन र विनियोजनसहित विभिन्न ऐन, कार्यविधि र नियमावली पारित गरेको हो

सभाबाट सार्वजनिक जवाफदेहिता प्रवद्र्धन सम्बन्धी कार्यविधि, २०७८, सूचना तथा अभिलेख केन्द्रको स्थापना तथा सञ्चालनसम्बन्धी कार्यविधि,२०७८, बाल क्लब गठन तथा परिचालन कार्यविधि, २०७८ र आन्तरिक नियन्त्रण प्रणाली निर्देशिका, २०७८ पारित भएको छ । सभाले स्थानीय पाठ्यक्रमलाई स्वीकृत गरेको छ । गाउँ शिक्षा समिति, त्यसअन्तर्गतका उपसमिति र कार्यदल हुँदै कार्यपालिका बैठकबाट पास गरेर सभामा प्रस्तत गरेको स्थानीय पाठ्यक्रम स्वीकृत भएसंगै आगामी शैक्षिक सत्रदेखि कक्षा १ बाट स्थानीय पाठ्यक्रम लागु गर्ने तयारी भएको गाउँपालिकाले जनाएको छ ।

सभाले ११ लाख ५९ हजार रुपैयाँ बराबरको सैद्धान्तिक बेरुजुलाई नियमित समेत गरेको छ । स्थानीय तह निर्वाचनको मतगणनामा सिसीटिभी जडान गर्ने कार्यका लागि उपकरण जडानका लागि ५ लाख रुपैयाँ बजेट विनियोजन भएको छ ।
सभामा गाउँपालिका अध्यक्ष भवबहादुर भण्डारीले प्रस्तुत गरेको पञ्चवर्षीय प्रगति समीक्षालाई समेत स्वीकृत गरिएको छ । सभामा अध्यक्ष भण्डारीले पाँचवर्षे कार्यकालमा गाउँपालिकामा भएका मुख्य उपलब्धिलाई प्रगति समीक्षाको रुपमा प्रस्तुत गरेका थिए । सो अवधिमा गाउँपालिकाले ऐन निर्माणसँगै विकास निर्माण तथा सामाजिक विकासमा महत्वपुर्ण हासिल गरेको बताए । उनले संघीयतासँगै गाउँपालिकाले शिक्षा, सडक, स्वास्थ्य, खानेपानी लगायत पूर्वाधार क्षेत्रको विकास गरेको उल्लेख गरे ।

प्रमुख जिल्ला अधिकारी चिरञ्जीवी रानाले पालिकाले गरेका उपलब्धिको अभिलेखीकरण गर्नु सकारात्मक रहेको बताए ।

कार्यक्रममा नेपाली कांग्रेसका उपसभापति केवी भण्डारी, नेकपा(एकिकृत समाजवादी)का जिल्ला अध्यक्ष कृष्णकुमार विश्वकर्मा, वडा अध्यक्षहरु जीवनकुमार मल्ल, बिलबहादुर फगामी, मनकुमार शेरपूञ्जा, गमान छन्त्याल, देउप्रसाद पुन लगायतले मन्तव्य बोलेका थिए । गाउँपालिका उपाध्यक्ष कमला तिलिजाले स्वागत र प्रमुख प्रशासकीय अधिकृत सुवेदीले संचालन गरेका थिए ।