पोखरा । साहित्यकार जनार्दनशरण त्रिपाठीका २ कृति एकैपटक लोकार्पण भएको छ ।
‘नेपाली सांस्कृतिक लेख’ शीर्षकको पुस्तक नेपाल प्रज्ञा प्रतिष्ठानका उपकुलपति जगमान गुरुङले लोकार्पण गरे । ‘नेपाली माटामा’ शीर्षक नाटकको लोकार्पण उच्च अदालत पोखराका मुख्य न्यायाधीश डिल्लीराज आचार्यले गरे ।
सो अवसरमा उपकुलपति गुरुङले नेपालश्री महाकाव्य लेखेर देश चिनाएका त्रिपाठीलाई नेपाली संस्कृतिबारे राम्रै ज्ञान रहेको उल्लेख गर्दै आफ्नो ब्रह्मले देखेको कुरा लेखेर ब्राम्हणको अस्तित्व राख्न सफल रहेको बताए । उनले भने, ‘ब्रम्ह नबुझ्नेले मात्र ब्राम्हणवादको विरोध गर्छन् ।’
मुख्य न्यायाधीश आचार्यले साहित्य सिर्जना गर्न सजिलो नभएको र अन्तर हृदयबाट पसिना काढ्नु पर्छ भन्दै देखेजस्तै लेख्नु र लेखेजस्तै व्यवहार गर्नु साहित्यकारको धर्म भएको बताए ।
नेपाली सांस्कृतिक लेख कृति समीक्षा गर्दै साहित्यकार भूपनिधि पन्तले त्रिपाठीले नेपालको सभ्यता र संस्कृतिबारे कलम चलाएको उल्लेख गरे । डा. रामचन्द्र पोखरेलले नेपाली माटामा कृतिको समीक्षा गर्दै नाटकमा नेपालीले भोगेको जीवन र सामाजिक विसंगति देखाइएको बताए ।
स्रष्टा जनार्दनशरण त्रिपाठीले सन् १९५० को सुगौली सन्धिपछि नेपालीहरु पलायन भएर विदेश जान लागेको र राष्ट्रियता कमजोर भएको चर्चा गर्दै राष्ट्रप्रति जागरण ल्याउनुपर्नेमा जोड दिए ।
गण्डकी प्रज्ञा प्रतिष्ठानका कुलपति सूर्य खड्का बिखर्चीले साहित्यकारको जीवित अवस्थामै सम्मान हुनुपर्नेमा जोड दिए ।
महाकाव्यकार माधव वियोगीले कुनै हल्ला नगरी खुरुखुरु पुस्तक निकाल्ने त्रिपाठी प्रेरणादायी व्यक्तित्व भएको उल्लेख गरे । नेपालश्री पुरस्कार कोषका उपाध्यक्ष डा. बावुराम अधिकारीको अध्यक्षतामा भएको कार्यक्रममा सचिव दुर्गा न्यौपानेले स्वागत र महासचिव छन्दमणि त्रिपाठीले संचालन गरेका थिए ।