पोखरा । आसन्न निर्वाचनमा गठबन्धनलाई वडा तहसम्म प्रभावकारीरुपमा लैजानु पर्ने गण्डकी सरकारमा सहभागी दलले निर्णय गरेका छन् ।

नेपाली कांग्रेस गण्डकी प्रदेश कार्यालयमा पार्टी सभापति शुक्रराज शर्माको अध्यक्षतामा बसेको बैठकले पाँचदलीय सहमतिअनुरुप दलीय आधारमा योग्य उम्मेदवारको चयन गर्ने निर्णय गरेको हो । सो निर्णयलाई वडासम्मै कार्यान्वयन गर्ने पक्षमा बैठकमा सहभागी नेताहरु एक भएको सभापति शर्माले जानकारी दिए ।

गठबन्धनका उम्मेदवारले पार्टीका तर्फबाट उमेदवारी दिंदा पाँचै दलबाट सहजरुपमा स्वीकार हुने किसिमका उम्मेदवार छनोट गर्ने विषयमा बैठक केन्द्रित भएको थियो । साथै, निर्वाचन आयोगले उम्मेदवारी नभएको जिल्लामा दलको नामबाट अनावश्यक चुनाव चिन्ह छापेर मतदातालाई भ्रमित पार्न नहुने सुझावसमेत राखिएको छ ।

निर्वाचनमा सत्तारुढ दलहरुबीच तालमेल गर्ने सहमति भएसँगै गण्डकी प्रदेशमा पनि बैठक बसी यसको तयारी गरिएको कांग्रेस गण्डकीका प्रचार विभाग प्रमुख रमेश पौडेलले बताए । प्रदेशमा यसअघि पनि गठबन्धनको बैठक बसेको थियो ।

बैठकमा नेपाली कांग्रेस प्रदेश सभापति शर्मासहित नेकपा माओवादी केन्द्र गण्डकी प्रदेशका अध्यक्ष गायत्री गुरुङ, नेकपा एकीकृत समाजवादीका उपाध्यक्ष केशवलाल श्रेष्ठ, जनता समाजवादी (जसपा) गण्डकी प्रदेश अध्यक्ष मोतीप्रसाद रिजाल, राष्ट्रिय जनमोर्चा गण्डकी प्रदेश अध्यक्ष शंकर बराल लगायतको उपस्थिति थियो ।