स्याङ्जा । मानवअधिकार तथा शान्ति समाज काठमाडौंको आयोजना तथा मानवअधिकार तथा शान्ति समाज स्याङ्जाको समन्वयमा हिमालय बचाऔं, नदी जोगाऔंलगायत युद्ध निषेध शान्ति विशेष कार्यक्रम गरेको छ ।

मानवअधिकारकर्मी, युवा, बालबालिका तथा नागरिकले नगर परिक्रमा गरी सदरमुकामस्थित सहिदचोक पुगेर कोणसभामा परिणत भएको थियो । सभालाई मानवअधिकार तथा शान्ति समाजका केन्द्रीय सभापति गोविन्द खनालले सम्बोधन गर्दै नागरिकका जीवन आधारसँग जोडिएका जीवन पद्धतिसँग सम्बन्धित रहेर काम समाजले विगतदेखि काम गर्दे आएको बताए ।

बढ्दो प्रकृतिको दोहनले मानव तथा जीव प्रणालीमा प्रत्यक्ष नकारात्मक असर परेको जनाउँदै उनले प्राकृतिक वस्तुका संरक्षणमा आजैदेखि जुट्न सुझाव दिए । हामीले हाम्रा प्रकृतिक सम्पदा जोगाउन नसकेको बताउँदै उनले हिमाल, नदी लगायत प्रकृतिका उपहार संरक्षण गरी तीसँग सम्बन्धित करोडौं जीवहरुको जीवन जीउन सहज बनाउने काम गर्नुपर्नेमा जोड दिए ।

युद्धले जहिले पनि हार्ने हुँदा युद्ध सधैंका लागि सबैले अन्त्य गरिनुपर्ने उनले बताए । रुसले युक्रेनमाथि गरेको आक्रमणले करोडौंको धनजन क्षति पुगेको छ भने लाखौं व्यक्ति विस्थापित र हजारौं व्यक्तिले ज्यान गुमाउनु परेको उनको भनाइ छ । यसैगरी, समाजका केन्द्रीय उपसभापति कृष्णबहादुर रावलले गुणस्तरीय स्वास्थ्य सेवा र वैज्ञानिक शिक्षा आजको आवश्यकता रहेको बताए ।

समाज स्याङ्जाका पूर्व उपसभापति हरिप्रसाद रेग्मीको अध्यक्षतामा भएको कार्यक्रममा निवर्तमान सभापति प्रकाश डोटेलले स्वागत र सचिव भवानी अधिकारीले सञ्चालन गरेका थिए । केन्द्रीय कार्यसमितिको निर्णयअनुसार चैत १७ देखि मुलुकका २१ जिल्लामा अभियान सञ्चालन भएको छ । गोरखाबाट सुरु अभियान सोमबार स्याङ्जा आइपुगेको हो ।