पोखरा । राष्ट्रिय सहकारी बैंक लिमिटेड पोखरा र तालचोक शाखाको आयोजनामा पोखराका सहकारीकर्मीलाई प्रविधिमा हुने जोखिम न्यूनीकरण साइबर सुरक्षा तालिम दिइएको छ । सहकारीहरु प्रविधिको उपयोगतर्फ अग्रसर भइरहेको अवस्थामा प्रविधिको प्रयोगमा आउन सक्ने जोखिमको पहिचान र न्यूनीकरणका लागि सहयोग पुग्ने उद्देश्यका साथ तालिम आयोजना गरिएको बैंकले जनाएको छ ।

बैंकका सञ्चालक तथा गण्डकी प्रदेशका संयोजक रामबहादुर जिसीले सहकारीलाई व्यावसायिक र मर्यादित बनाउन प्रविधिको प्रयोग अपरिहार्य भएको बताउँदै प्रविधिको प्रयोग गर्दा पनि व्यसायमा हुने नोक्सानीलाई न्यूनीकरणका लागि साइवर सुरक्षा सम्बन्धी सचेतना आवश्यक रहेको उल्लेख गरे ।

कार्यक्रममा सहजीकरण गर्दै बैंकका आइटी विभाग प्रमुख नवीनकुमार कार्कीले प्रविधिको पहुँच बढेसँगै यो क्षेत्रमा विभिन्न प्रकारका चुनौतीहरु पनि आएको बताए ।

कार्यक्रम राष्ट्रिय सहकारी बैंक पोखरा शाखा समन्वय उपसमितिका संयोजक तुलसीप्रसाद गुरुङको अध्यक्षतामा भएको कार्यक्रममा पोखरा शाखाका प्रमुख नरेश पाण्डेले स्वागत र तालचोक शाखाका प्रमुख सन्तोष घिमिरेले सञ्चालन गरेका थिए ।