बुटवल । राष्ट्रिय प्रजातन्त्र पार्टी (राप्रपा) अध्यक्ष राजेन्द्र लिङ्देनले नेपाली कांग्रेस, नेकपा (एमाले) र नेकपा (माओवादी केन्द्र) नामले अलग पार्टी भए पनि विचारले भने एउटै पार्टी रहेको दाबी गरेका छन् । उनले ठूला भनिने दलले ३२ वर्षसम्म मुलुकलाई बन्धक बनाएर राखेको आरोप लगाए ।
राप्रपा रुपन्देहीले सोमबार भैरहवामा आयोजना गरेको आमसभा तथा पार्टी प्रवेश कार्यक्रमलाई सम्बोधन गर्दै लिङ्देनले देशको अवस्था सामान्य देखिए पनि सामान्य भने नरहेको बताए । उनले भने, ‘अहिले मुलुकमा आमहड्ताल भएको छैन, आन्दोलन भएको छैन, मुलुक सामान्यजस्तो देखिएको छ तर अवस्था सामान्य छैन । अदालत अदालत जस्तो छैन, संसद् संसद्जस्तो छैन र सरकार सरकारजस्तो छैन ।’ सम्पूर्ण विकासका योजनाहरु रोकिएको र सम्पन्न भएका योजनाहरु भुक्तानीसमेत सरकारबाट हुन नसकेको उनले बताए ।
उनले विदेशीलाई मालिक मानेर सत्ता टिकाउने खेलमा तीनै दल बराबर जिम्मेवार रहेको आरोप लगाए । उनले भने, ‘नेपाल राष्ट्रलाई दुर्गतिको बिन्दुमा पुर्‍याउन तीनै दल जिम्मेवार छन्, आज देश जुन स्थितिमा छ पर्खने र हेर्ने छुट छैन, पर्खने र हेर्न भुल गर्यौ भने भावी सन्ततिको भविष्य धरापमा पर्छ । ’
नेता र पार्टीलाई दोष दिएर मात्र उन्मुक्ति नपाइने भन्दै निर्वाचनमा भोट दिने हात पनि कम दोषी नरहेको उनको भनाइ थियो । भोट दिएर जिताएको प्रतिनिधि गलत भए समाज र मुलुकले नै दुख पाउने उनले जिकिर गरे । उनले भने, ‘देश बिग्रिए ओली, देउवा र प्रचण्डको के बिग्रन्छ ? युवाको भविष्य बिग्रन्छ ।’ भोट दिने कुरा छोरी दिने कुराभन्दा पनि ठूलो भएको उनको भनाइ थियो ।
भोट गलत मान्छे र पार्टीलाई गयो भने पूरै देश र समाजले दुख पाउने उनले बताए । ३१–३२ वर्ष देशको नेतृत्व गर्ने अवसर पाएका दलहरुले देशले एउटा सम्झने कुरा पनि गर्न नसकेको उनले बताए ।
राप्रपा केन्द्रीय उपाध्यक्ष धु्रव प्रधानले राप्रपाप्रति नेपाली जनता आकर्षित भएको दाबी गरे । उनले संस्कार, संस्कृति जोगाउन राप्रपालाई जिताउनुपर्ने बताए । राप्रपाका प्रवक्ता ज्ञानेन्द्र शाहीले राप्रपा देशको एक नम्बर पार्टी बन्ने दाबी गरे । उनले राष्ट्रघातीलाई स्वीकार नगर्ने बताए ।