पोखरा । नेपाली लेखक संघको अध्यक्षमा पोखराका तीर्थ श्रेष्ठ निर्विरोध निर्वाचित भएका छन् । संघको पोखरामा भएको ७ औं अधिवेशनले श्रेष्ठलाई अध्यक्ष चयन गरेको हो । पोखरामा आइतबारसम्म चल्ने अधिवेशनले संघको नयाँ कार्यसमिति चयन गर्नेछ ।
अधिवेशनअन्तर्गत अध्यक्ष, कोषाध्यक्ष, ६ वटा प्रदेशका प्रतिनिधि र समावेशी सदस्यहरु निर्विरोध निर्वाचित भएको निर्वाचन संयोजक ईश्वरमणि अधिकारीले जानकारी दिए । अध्यक्षमा श्रेष्ठसहित कोषाध्यक्षमा दामु मर्सिफुल निर्वाचित भएका हुन् । यस्तै प्रदेशतर्फ १ नम्बर प्रदेशमा भीष्म काफ्ले, मधेशमा कुमार दाहाल, वागमतीमा भगवती खनाल, गण्डकीमा अञ्जना न्यौपाने, लुम्बिनीमा वासुदेव जम्मरकट्टेल, सुदुरपश्चिममा विष्णुबहादुर गौल्याल निर्वाचित भएको उनले जानकारी दिए । यसैगरी समावेशी सदस्यहरु आदिवासी जनजातितर्फ सञ्जाकुमारी दनुवार, मधेशी/थारुतर्फ गोपाल अस्क, दलिततर्फ गणेशबहादुर नेपाली, मुस्लिम/अपांगतर्फ जीवन आचार्य ‘निश्चल’ र पिछडिएका वर्गतर्फ तपेन्द्र घोडासैनी निर्वाचित भएको निर्वाचन संयोजक डा. अधिकारीले जानकारी दिए ।
अन्य पदमा भने एकभन्दा बढीको उम्मेदवारी परेको डा. अधिकारीले बताए । सहअध्यक्षमा डा. रत्नमणि नेपाल र रामलाल जोशी, उपाध्यक्षमा डा. शैलेन्द्रप्रकाश नेपाल र रामेश्वर राउत, उपाध्यक्ष (महिला) मा डा. रेणु थापा ‘सोल’ र सन्ध्या पहारी, महासचिवमा घनेन्द्र ओझा, मनोज न्यौपाने र सोझो गाउँलेको उम्मेदवारी परेको उनले बताए । यसैगरी उपमहासचिवमा बलराम दाहाल र श्रीबाबु कार्की ‘उदास’ सचिव (महिला) मा शशी थापा पण्डित र अनुपमा रेग्मी, सचिवमा हेम प्रभास, मुरारी दुलाल र गणेश शर्माको उम्मेदवारी परेको छ ।
प्रदेशतर्फ कर्णाली प्रदेशको प्रतिनिधिमा महेन्द्रचन्द्र महासागर र डा. कृष्णराज बिसीको उम्मेदवारी परेको उनले जानकारी दिए । यसैगरी ५ जना महिला सदस्यमा ८ जना र खुलातर्फ १० सदस्यका लागि १५ जनाले उम्मेदवारी दिएका छन् ।
आइतबार बिहान ९ बजेसम्म उम्मेदवारी फिर्ता, साढे ९ बजे अन्तिम नामावली र १० बजेदेखि मतदानको समय तोकिएको निर्वाचन संयोजक डा. अधिकारीले जानकारी दिए ।