पोखरा । पोखरा–१, बगरस्थित पोखरा माविमा कक्षा ११ व्यवस्थापन विषय अध्ययनरत् विद्यार्थीको टोलीले बिहीबार आदर्श समाज राष्ट्रिय दैनिकको कार्यालय अवलोकन गरेको छ ।
विद्यालय प्रधानाध्यापक नारायण न्यौपानेको नेतृत्वमा आएको सो टोलीले पोखरा–१४ चाउथेस्थित आदर्श समाजको छापाखानासमेत अवलोकन गरेको थियो । टोलीमा ३५ जना छात्रछात्रा सहभागी थिए ।
त्यस अवसरमा पत्रिकाका संस्थापक कृष्णप्रसाद बास्तोलाले समाचार संकलनदेखि सम्पादन र पत्रिका प्रकाशनको विविध पक्षबारे जानकारी गराएका थिए ।
छापाखाना अवलोकनपछि आदर्श समाज कम्प्लेक्समा आयोजित कवि गोष्ठीमा शिव त्रिपाठी, अमृत बास्तोला, सुविन नेपाली र समीक्षा पौडेलले कविता वाचन गरे । अनुजा गौतमले धन्यवाद ज्ञापन गरेकी थिइन् ।
त्यसअघि विद्यालयका शिक्षक एवं कार्यक्रम संयोजक शिव त्रिपाठीले अवलोकनबाट पत्रिका प्रकाशनबारे विद्यार्थीको जिज्ञासा पूरा हुने विश्वास व्यक्त गरे ।
२०५३ सालदेखि निरन्तर प्रकाशित आदर्श समाज राष्ट्रिय दैनिक आगामी वैशाख १ गतेबाट २६ वर्ष पूरा गरी २७ औं वर्षमा प्रवेश गर्दैछ ।