पोखरा । म्यादी प्रहरीको शारीरीक परीक्षा कटाएकी पोखरा १६, जैमुरेकी सरिता परियार निकै खुसी देखिइन् । बिहीबार बिहानैदेखि लाइन बसेकी उनी दिउँसो करिब ३ बजे प्रारम्भिक स्वास्थ्य परीक्षण र शारीरिक तन्दुरुस्ती परीक्षामा पास भएर बाहिरिएकी हुन् ।
एकातिर पास हुनुको खुसी थियो भने अर्कोतर्फ चिन्ता थियो–भोलिपल्टको लिखित र मौखिक परीक्षाको । उमेर ३२ लागेकी परियारले घरमा १ छोरा र १ छोरी छाडेर म्यादी बन्ने निस्केको बताइन् । ९ वर्षअघि विदेश गएका उनका पति अझै घर फर्किएका छैनन् ।
चैतमासको तातो घाममा दौडिनुको एउटै कारण हो–छोराछारीको लालनपालन र पढाइ खर्च । श्रीमान्को अत्तोपत्तो नहुँदा परियारलाई व्यवहारले थिचेको छ । दैनिक ज्यालादारी काम गर्दै गुजारा टारेकी उनलाई म्यादी प्रहरीले केही आशा जगाएको छ । ‘घरव्यवहार चलाउनै गाह्रो अवस्था छ,’ उनले गुनासो गरिन्, ‘सुरक्षा सेवामा लाग्ने सानैदेखिको रहर पनि हो तर अहिले भने बाध्यता बन्यो । यहाँबाट पाउने ३०/४० हजारले केही भए पनि खर्च टर्ला नि !’
लमजुङ सिंदीका उपेन्द्र गुरुङ पनि म्यादीका लागि दौडकै लाइनमा थिए । उनी भने खाली समयको सदुपयोग पनि हुने अलिअलि भए कमाइ हुने सोचले म्यादीमा हानिएका हुन् । भर्खरै २२ वर्ष लागेका गुरुङ उमेर छँदासम्म भारतीय सेना र सिंगापुर पुलिसमा भर्ती देखिदै हिंडे । दौड सधैं कटाउने तर कहिले लिखित त कहिले शारीरिक परीक्षामा फेल हुँदा सैनिक बन्ने उनको सपना अपूरो थियो । अपूरो सपना साकार पार्न म्यादीको लाइन बसेको उनले सुनाए ।
स्याङ्जा हरिनासका २२ वर्षीय चित्रनारायण मानन्धर नेपाल आर्मी र भारतीय आर्मीमा भर्ती हुन नसकेपछि मनको रहर पूरा गर्न आएको बताउँछन् । ‘नेपाल आर्मीमा ३, इन्डियन आर्मीमा ५ पटक जाँदा नि भर्ती भइएन,’ उनले भने, ‘अहिले यत्तिकै बसेको थिएँ । देशको सेवा गर्ने सपना पनि पूरा हुने भयो अलिअलि कमाइ पनि हुने ।’

म्यादी प्रहरी बन्न कास्कीमा ४ हजार १ सय जनाले फर्म भरेकोमा ९ सय ३५ महिला छन्

सरिता, उपेन्द्र र चित्रजस्तै गरिबी, जिम्मेवारी, बाध्यता र रहरले रोजगारीको खोजीमा रहेका युवादेखि ४० कटेकाहरु म्यादी प्रहरीका लागि लाइनमा थिए । आगामी वैशाख ३० गते स्थानीय तहको निर्वाचनका कास्कीबाट १ हजार ४ सय ७१ म्यादी प्रहरी माग गरिएको प्रहरी निरीक्षक खगेन्द्र अधिकारीले जानकारी दिए । सोही सूचना आधारमा कास्कीमा ४ हजार १ सय जनाले फर्म भरेका थिए । तीमध्ये ९ सय ३५ महिला छन् ।

म्यादी प्रहरीलाई ७ दिन तालिम दिएर खटाउने तयारी छ । पूर्व नेपाली सेना, प्रहरी तथा विगतमा पनि म्यादी प्रहरीको अनुभव बटुलेकालाई प्राथमिकतामा राखिनेछ । मापदण्डको दोस्रो प्राथमिकतामा पूर्व वनरक्षक र सेना, प्रहरी र सशस्त्र प्रहरी बलमा भर्नाका लागि आवेदन दिएर शारीरिक परीक्षणमा पनि सहभागी भएकाहरु पर्ने छन् । शारीरिक छनोटको काम बिहीबार सकिएको छ । पास भएकाहरुको शुक्रबारदेखि लिखित परीक्षा हुनेछ । सशस्त्र प्रहरी गुल्म गण्डकी (पार्दी)मा संचालन गरेको प्रारम्भिक स्वास्थ्य परीक्षण र शारीरिक तन्दुरुस्ती परीक्षामा उत्तीर्ण उम्मेदवारको लिखित परीक्षा दिउँसो १ बजेदेखि हुने कास्की प्रहरी प्रवक्ता प्रहरी नायव उपरीक्षक सुन्दर तिवारीले जानकारी दिए ।
यस पटक म्यादी प्रहरीले नेपाल प्रहरीको मातहतमा रही ४० दिन खटिनुपर्छ । मापदण्डमा उल्लेख भएअनुसार म्यादी प्रहरीले प्रहरी जवानसरह ठाउँअनुसार ३० हजारदेखि ७५ हजार रुपैयाँसम्म तलब पाउँछन् । प्रत्येक म्यादी प्रहरीले खाद्यान्नबापत ७ हजार २ सय, पोसाक र अन्य खर्च गर्ने गरी ६ हजार, यातायात खर्चबापत १ हजार र बिमा सुविधासमेत पाउँछन् । छनोट समितिले आवेदनबाट योग्य व्यक्ति छानेपछि उनीहरुलाई १ साता तालिम दिइनेछ । तालिम लिएकालाई त्यसपछि चुनावी क्षेत्रमा खटाइनेछ ।