लमजुङ । स्थानीय तहको आउँदो वैशाख ३० गते हुने निर्वाचनका लागि लमजुङमा १६ हजारभन्दा बढी नयाँ मतदाता थपिएका छन् । निर्वाचन आयोगले प्रकाशन गरेको मतदाताको अन्तिम नामावली विवरणअनुसार जिल्लामा १६ हजार ४५ जना नयाँ मतदाता थपिएका हुन् ।
२०७४ सालमा भएको प्रदेश तथा प्रतिनिधि सभा निर्वाचनमा जिल्लामा १ लाख १५ हजार ४ सय ४९ जना मतदाता थिए । निर्वाचन आयोगले सार्वजनिक गरेको विवरणअनुसार जिल्लामा १ लाख ३१ हजार ४ सय ९४ जना मतदाता कायम भएको जिल्ला निर्वाचन अधिकारी सिर्जना मिश्रले बताइन् । उनका अनुसार २०७४ मा भएको स्थानीय तह निर्वाचनमा जिल्लामा १ लाख ५ हजार ९ सय ९२ मतदाता थिए ।
जिल्लाको विवरणअनुसार सबैभन्दा बढी मतदाता संख्या सदरमुकाम समेत रहेको बेंसीसहर नगरपालिकामा छन् । बेंसीसहरमा १२ हजार ४ सय ९१ पुरुष र १३ हजार ७ सय १६ महिलासहित २६ हजार २ सय ७ मतदाता रहेको जिल्ला निर्वाचन कार्यालयले जनाएको छ ।
जिल्लामा सबैभन्दा कम मतदाता दूधपोखरी गाउँपालिकामा ४ हजार ५ सय ७ पुरुष र ४ हजार ३ सय ८१ महिलासहित ८ हजार ८ सय ८८ मतदाता छन् । क्होंलासोंथार गाउँपालिकामा ४ हजार ५ सय २२ पुरुष र ४ हजार ७ सय ७६ महिला सहित ९ हजार २ सय ९८ मतदाता कायम भएको छ ।
दोर्दी गाउँपालिकामा ७ हजार ५ सय ५२ पुरुष र ७ हजार ५ सय ३२ महिलासहित १५ हजार ८४ जना मतदाता छन् । मस्र्याङ्दी गाउँपालिकामा ७ हजार ५ सय ५१ पुरुष र ७ हजार ५ सय ८९ महिलासहित २० हजार ९२ मतदाता कायम भएको छ ।
जिल्लाको सुन्दरनगरपालिकामा २० हजार ७ सय ९६ मतदाता मध्ये ९ हजार ९ सय २७ पुरुष र १० हजार ८ सय ६९ महिला छन् । २० हजार ९२ मतदाता कायम भएको मध्यनेपाल नगरपालिकामा भने ९ हजार ७ सय १२ पुरुष र १० हजार ३ सय ८० महिला छन् । त्यस्तै जिल्लाको राइनास नगरपालिकामा ७ हजार ७ सय ७९ पुरुष र ८ हजार २ सय १० महिलासहित १५ हजार ९ सय ८९ मतदाता कायम भएको निर्वाचन आयोगले जनाएको छ ।
जिल्ला निर्वाचन कार्यालय लमजुङले पछिल्लो अद्यावधिमा मात्रै ९ हजार ६ सय ३० मतदाताको नामावली निर्वाचन आयोगमा पठाएको थियो । सोबाहेक मतदाता नामावली अद्यावधिकका लागि दिएको समय सिमामा परेका निवेदन वा उजुरीको आधारमा जिल्लाबाट १ हजार ३ सय १ जनाको नाम हटाउनुका लागि सिफारिस गरेको कार्यालयले जनाएको छ ।
यसअघिको निर्वाचनपश्चातको अवधिमा बसाइँसराइँ वा विवाह भएर अन्यत्र गएका, दोहोरो नाम भएका र मृत्यु भएकाहरुको नामावली हटाउनको लागि आयोगमा सिफारिस भएको निर्वाचन कार्यालय लमजुङका सूचना अधिकारी जीवाखर शर्माले जानकारी दिए ।