पोखरा । गोरखाको धार्चे गाउँपालिकालाई कोभिड–१९ विरुद्धको पूर्णखोपयुक्त गाउँपालिका घोषणा गरिएको छ । मंगलबार विशेष कार्यक्रमबीच प्रमुख जिल्ला अधिकारी शंकरहरि आचार्यले पूर्णखोपयुक्त पालिका घोषणा गरेका हुन् । १० हजार ५ सय ५७ जनाले दोस्रो डोज खोप लगाएका कारण पूर्णखोपयुक्त पालिका घोषणा गरिएको पालिका अध्यक्ष सन्तबहादुर गुरुङले जानकारी दिए । ‘१२ वर्षमाथिका सबै नागरिकले खोप पाउनुभयो,’ उनले भने, ‘निकै कष्टपूर्ण रुपमा पूर्ण खोप युक्त पालिका बनायौं ।’
धार्चे गण्डकीमा दोस्रो र गोरखामा पहिलो पालिकाको रुपमा घोषित भएको हो । प्रमुख जिल्ला अधिकारी आचार्यले धार्चेले जिल्लालाई नै नेतृत्व गरेको बताए । ‘धार्चेले सबैलाई नेतृत्व गरेको छ । यो सुखद कुरा हो,’ उनले भने, ‘अब बिस्तारै अरु पालिकामा पनि कार्यक्रम हुन्छन् ।’
योसँगै पालिकाले २ वर्षमुनिका सबै बालबालिकालाई खोप लगाएर छिट्टै नियमित पूर्ण खोप घोषणा गर्ने तयारी थालेको उपाध्यक्ष फूलमाया गुरुङले जानकारी दिइन् । ‘कोभिडको सुरुमा साह्रै सकस भयो । आइसोलेसन बनाउँदा गाउँलेले ढुंगामुढा गरे,’ उनले भनिन्, ‘तर हामी हाम्रो जिम्मेवारीबाट पन्छिएनौं । जुधेरै भए पनि कोभिड विरुद्धको काममा जुट्यौं ।’
सोही अवसरमा कोभिड नियन्त्रणमा सहयोग गर्ने स्वास्थ्यकर्मी, स्वास्थ्य स्वंसेविकालगायतलाई सम्मान गरिएको थियो ।