पोखरा । लाङ्दी भूमि पूजाको अवसरमा पर्वतको मोदी गाउँपालिका वडा ३, देउरालीस्थित लाङ्दी भूमि मन्दिर परिसरमा सत्तल (ट्रस्ट) तथा शौचालय निर्माण गरिएको छ ।
कुल ११ लाख ४७ हजार रुपैयाँमा निर्मित सो सत्तलका लागि गण्डकी प्रदेश सांसद विकास कोषबाट ९ लाख २३ हजार र नपुग लाङ्दी भूमि मन्दिर कोषबाट २ लाख २४ हजार खर्च गरिएको थियो ।
सत्तलको प्रदेश सभा सदस्य ललितकला गुरुङले उद्घाटन गर्दै भूमि मन्दिरप्रति व्यवस्थापन, खानेपानी, वृक्षरोपन गरी हरियाली बनाएर मन्दिर नै रौनक आउने बनाएकोमा व्यवस्थापनप्रति धन्यवाद दिइन् । उनले धार्मिक संस्थाको संरक्षण, सम्बद्र्धन, भेदभाव अक्षुण्ण राखी सद्भावका साथ संस्कार संस्कृतिलाई निरन्तरता दिंदै विकासको क्रममा अगाडि बढ्नुपर्ने बताइन् । सत्तल ट्रस्ट शौचालयबाट लाङ्दीवासी लाभान्वित हुने उनको भनाइ थियो ।
कार्यक्रममा मोदी गाउँपालिका ३ का वडाध्यक्ष देवेन्द्रबहादुर क्षेत्री, वडा १ अध्यक्ष गौप्रसाद गुरुङ, नेकपा एमाले जिल्ला कमिटी सदस्य नन्दमाया पुन, कांग्रेस वडा सभापति कृष्णबहादुर, माओवादी केन्द्रका वडा इकाइ अध्यक्ष टीकाबहादुर पुन, पूर्व अध्यक्ष तथा लाङ्दी समाजका सल्लाहकार क्या. चक्रबहादुर गुरुङ, भूमि मन्दिर व्यवस्थापन समिति सल्लाहकार सु.धनबहादुर गुरुङ, भूमि मन्दिर व्यवस्थापन सचिव कोषाध्यक्ष चन्द्रप्रसाद गुरुङ र कोषाध्यक्ष चन्द्रबहादुर गुरुङ, लाङ्दी तमु समाज पोखराका उपाध्यक्ष बालकृष्ण गुरुङ लगायतले मन्दिर व्यवस्थापनको विकास तथा भावी रणनीतिबारे बोलेका थिए ।
भूमि मन्दिर व्यवस्थापन समिति अध्यक्ष मोहनप्रसाद गुरुङको अध्यक्षतामा भएको कार्यक्रममा स्वागत लाङ्दी तमु समाजका उपाध्यक्ष सु.मे.शेरबहादुर गुरुङ र कार्यक्रम संचालन लाङ्दी तमु समाज पोखराका सचिव चिजकाजी गुरुङले गरेको समिति सचिव चन्द्रप्रसाद गुरुङले जानकारी दिए ।