हेमजा । हेमजास्थित किसान बहुउद्देश्यीय सहकारी संस्थाको आयोजनामा नयाँ सेयर सदस्यका लागि सहकारी शिक्षा अभिमुखीकरण कार्यक्रम भएको छ ।
कार्यक्रममा धारणा राख्दै शिक्षा उपसमिति संयोजक तिलकप्रसाद तिम्सिनाले सहकारीमा सहकार्यको भावना हुने भएकाले सदस्यले सामूहिकतामा विश्वास गर्नुपर्ने बताए । निवर्तमान अध्यक्ष एवं सल्लाहकार धर्मराज बास्तोलाले सहकारीको परिचयसहित इतिहासका बारेमा प्रष्टाए । उनले संस्थामा सेयर सदस्यको भूमिकाबारे स्पष्ट पारे । त्यस्तै सहकारीका व्यवस्थापक हरिप्रसाद त्रिपाठीले संस्थाका नियम, विनियमबारे जानकारी दिए ।
संस्थाका अध्यक्ष मोतिराम तिम्सिनाको अध्यक्षतामा भएको उक्त कार्यक्रममा शिक्षा उपसमिति संयोजक तिम्सिनाले स्वागत, कोषाध्यक्ष बुद्घिप्रसाद बास्तोलाले ७ सिद्घान्त वाचन एवं शिक्षा उपसमिति सदस्य प्रेमबहादुर कुँवरले सञ्चालन गरे ।