पोखरा । मनुश्री–भिग्नाजित जेटीआई राष्ट्रिय जुनियर टेनिस प्रतियोगिताअन्तर्गत यु–१४ इभेन्टमा राजवीर प्रधानले स्वर्ण जितेका छन् ।
कास्की जिल्ला टेनिस संघको आयोजनामा जारी प्रतियोगिताअन्तर्गत बुधबार फाइनलमा पोखराका दर्शिल श्रेष्ठलाई ६–२, ६–२ ले पराजित गर्दै १२ हजारसहितको उपाधि जितेका हुन् । दोस्रो स्थानमै चित्त बुझाएका दर्शिल ६ हजार सहित पुरस्कृत भए ।
यु–१२ को इभेन्टमा ब्रिजेश अर्यालले प्रथम, स्पर्श तिमिल्सिना क्षत्रीले द्वितीय, अशाभ सम्राट हाडाले तृतीय भए । विजेता नगद ८ हजार तथा उप–विजेता नगद ५ हजार सहित पुरस्कृृत भए ।
ब्वाइजकै १० वर्षमुनिको इभेन्टमा विश्व डल्लाकोटी प्रथम, संघर्ष फोकदार द्वितीय, सन्दीप जिसी तृतीय, सनम सापकोटा चांैथो भए । ८ वर्षमुनिको ब्वाइज सिंगल उपाधि पोखराका आर्यश राज पौडेलले जिते । फाइलनमा उनले पोखराकै नितेश थापालाई पराजित गर्दै नेपालको शीर्षस्थान कायमै राखे । प्रतियोगितामा निर्जल टन्डनले तेस्रो तथा सुभान केसीले चौंथो स्थान हासिल गरे ।
विजयी खेलाडीलाई पोखरा महानगर खेलकुद विकास समिति अध्यक्ष दीपक गोदार, कास्की जिल्ला टेनिस अभिभावक संघका सदस्य भीष्मराज पौडेल, अभिभावक प्रेमप्रकाश गौतम लगायतले पुरस्कार वितरण गरे ।
महिलातर्फका विभिन्न इभेन्टको फाइनल र अन्य कन्सुलेसन खेल जारी रहेको प्रतियोगिता संयोजक नवीन श्रेष्ठले जानकारी दिए ।