पोखरा । इन्धनमा चरम मूल्यवृद्धि भएको भन्दै यातायात व्यवसायीले आफैं गाडीभाडा वृद्धि गरेका छन् । १५ चैतदेखि लागु हुने गरी पृथ्वी राजमार्ग बस सञ्चालक कम्पनीले आफू मातहतका गाडीको भाडा बढाएको हो । साप्ताहिकरुपमा बढेको इन्धनको मूल्यअनुसार सार्वजनिक यातायातको भाडा बढाउन सरकार उदासीन बनेको भन्दै व्यवसायीले बढाएका हुन् ।
यातायात व्यवस्था कार्यालय गण्डकी र जिल्ला प्रहरी कार्यालय कास्कीलाई बोधार्थ दिएर कम्पनीले जिल्ला प्रशासन कार्यालयलाई ज्ञापनपत्र दिएको छ । सरकारले यातायात व्यवसायी समितिलाई कम्पनी ऐनअनुसार रुपान्तरण गरे पनि कार्यविधि र ऐन कानुनको निर्माण नहुँदा कठिनाइ झेल्नुपरेको कम्पनी अध्यक्ष योगेन्द्र केसीले बताए ।
‘१ सय ७ रुपैयाँ डिजेलको मूल्य हुँदा समायोजन भएको भाडा डिजेल १ सय ३८ पुग्दा पनि उही छ । इन्धनमा ५ रुपैयाँ बढ्दा भाडा समायोजन गर्ने सहमति भएकोमा समयसापेक्ष र वैज्ञानिक भाडादरको सिद्धान्त लागु भएन,’ उनले भने, ‘अहिलेको अवस्थामा सरकार निर्वाचनकेन्द्रित मात्र भएकोले भाडा समायोजनसम्बन्धी हाम्रो मागप्रति उदासीन रहेको छ । यही बसभाडामा सेवा सञ्चालन गर्न यातायात व्यवसायीहरु असमर्थ रहेकोले भाडा बढाएका हौं ।’
उनले बन्द हड्तालको सट्टा आफैं भाडा बढाएर सेवा दिने निर्णयअनुसार भाडा वृद्धि गरेको बताए । ‘बन्द हड्तालजस्ता अमानवीय तथा अप्रिय क्रियाकलाप गर्नुभन्दा भाडा बढाएर सेवा सञ्चालन गर्नु नै उपयुक्त हुने निष्कर्षमा पुग्यौं । हाम्रा सवारीसाधन चल्न नसक्ने अवस्था रहकोले रहरले नभई बाध्यताले २० प्रतिशत भाडावृद्धि गरी सेवा सुचारु गर्ने निर्णय लिन बाध्य भएको हो,’ केसीले भने ।
ज्ञापनपत्रमा दैनिक उपभोग्य वस्तुको मूल्य सत्प्रतिशत बढ्दासमेत सरकारले चासो नदिएको गुनासो छ । ‘दैनिक उपभोग्य वस्तु सत्प्रतिशत मूल्य बढेको छ । यसमा न सरकारको दृष्टि पुगेको छ, न त उपभोक्ता मञ्चको,’ ज्ञापनपत्रमा लेखिएको छ, ‘दैनिक मूल्य बढेकोबढ्यै गर्दा हामीले गाडी चलाउन सक्ने अवस्था रहेन ।’
२०६५ सालमा वैज्ञानिक भाडादर पुनरावलोकन समिति गठन भएपछि उक्त समितिको प्रतिवेदनअनुसार २ भागमा वर्गीकरण गरेर १८ तत्वका आधारमा ६५ प्रतिशत र ३५ प्रतिशत इन्धनलाई आधार बनाइएको छ । २०६९ देखि समायोजन नभएको भाडा गत असार अन्तिममा समायोजन भएको थियो । भाडा निर्धारण र समायोजनका लागि सरकारी समिति भए पनि व्यवसायीले कानुनविपरीत आफैं भाडा बढाएका हुन् ।