हेमजा । युवा रेडक्रस सर्कल हेमजाको आयोजना तथा हेमजा उपशाखाको सहआयोजनामा युवाका लागि रेडक्रस विषयक अभिमुखीकरण कार्यक्रम भएको छ ।
कार्यक्रममा रेडक्रस कास्की उपकोषाध्यक्ष कृष्णप्रसाद पौडेलले युवाहरुलाई मानव कल्याणकारी कार्य गराउन रेडक्रसको भूमिका महत्वपूर्ण रहँदै आएको बताए । उनले रेडक्रसका आधारभूत जानकारी लिन अभिमुखीकरण फलदायी हुने विश्वास समेत व्यक्त गरे ।
विष्णुपादुका माविका प्रअ दीपकराज पौडेलले रेडक्रस पवित्र सामाजिक संस्था भएको चर्चा गर्दै युवामा रेडक्रसको ज्ञान अत्यावश्यक रहेको धारणा राखे ।
हेमजा उपशाखा सभापति नेत्रपाणि भण्डारीले उपशाखा युवालाई क्रियाशील बनाउन र सर्कलसँग सहकार्य गर्न सधै तयार रहेको स्पष्ट पारे । त्यस अवसरमा रेडक्रस कर्मचारी समेत रहेका प्रशिक्षक नवराज भण्डारीले रेडक्रसको स्थापना, त्यसले समाजमा गरेका रचनात्मक तथा मानव कल्याणकारी कार्यका बारेमा जानकारी दिए ।
सर्कलका अध्यक्ष अनिल पौडेलको अध्यक्षतामा सम्पन्न उक्त कार्यक्रममा कोषाध्यक्ष राज पौडेलले स्वागत, सहकोषाध्यक्ष विनोद पौडेलले ७ सिद्घान्त वाचन तथा सचिव सन्तोष पौडेलले संचालन गरे ।
कार्यक्रममा हेमजाका विभिन्न विद्यालयका विद्यार्थी तथा अन्य युवा गरी ३० जना कार्यक्रममा सहभागी भए ।