पोखरा । प्राज्ञिक विद्यार्थी परिषद्, नेपालको पूर्णकालिक कार्यकर्ता प्रशिक्षण वर्ग पोखरामा भएको छ । पोखरा २० भलामस्थित हरिहर गुफा आश्रममा भएको प्रशिक्षणमा देशभरबाट विद्यार्थी परिषद्का ३२ जना पूर्णकालिक कार्यकर्ता सहभागी थिए ।
समापन कार्यक्रममा हिन्दु स्वयंसेवक संघ नेपालका राष्ट्रिय प्रचार प्रमुख डा. दीपककुमार अधिकारीले विद्यार्थी परिषद्को कार्य राष्ट्रिय कार्य भएकाले कार्यकर्ताहरुले राष्ट्रको सही जानकारी राख्नुपर्नेमा जोड दिए । समाज, देश, धर्मको सर्वांगीण विकास गर्नका लागि केही मानिसले लामो समय निस्वार्थ बुद्धिका साथ समाजमा काम गर्नुपर्ने उल्लेख गरे ।
कार्यक्रममा त्रिभुवन विश्वविद्यालय व्यवस्थापन संकायका प्रमुख प्राडा रामजी गौतम, वर्तमान अध्यक्ष उपप्राध्यापक डा. गोपीनाथ कँडेल, राष्ट्रियसंगठन सचिव नारायणप्रसाद ढकाल, राष्ट्रिय संगठन सहसचिव रमेश कँडेल सहभागी थिए ।