पोखरा । नेपाल माइक्रो फाइनान्स बैंकर्स एसोसिएसनको भेला पोखरामा भएको छ । देशभरका ४० भन्दा बढी माइक्रो फाइनान्सका प्रमुखको भेला भएका थिए ।
भेलाले माइक्रो फाइनान्स कम्पनीहरुको समस्या समाधानका विषयमा छलफल गरेको थियो । भेलाले ऋणीको ऋण उठाउँदा ऋणीहरुको आत्मसम्मान र मर्यादामा चोट नपु¥याउने निर्णय गरेको जनाइएको छ । माइक्रो फाइनान्सले नेपालभर ५६ लाख परिवारलाई ऋण दिइरहेको एसोसिएसन अध्यक्ष प्रकाशराज शर्माले बताए । पछिल्लो समय माइक्रो फाइनान्सले थोरै लगानी गर्न चाहने र महिलाका लागि काम गरिएको उनको भनाइ थियो ।
भेलाले मिडियाको उचित प्रयोग गर्दै माइक्रो फाइनान्सले गरेका सफलताका कथा बाहिर ल्याउने निर्णय पनि गरेको छ । केही मिडियाले २० प्रतिशतसम्म व्याजदर लिने गलत समाचार सम्प्रेषण गरेको प्रति आपत्ति जनाएको छ । ‘पछिल्ला समय केही मिडियाले धेरै ब्याजदर लिएको गलत समाचार दिइरहेका छन्,’ उनले भने, ‘यसरी गलत समाचार दिनु अघि एक पटक सोध्नुपर्ने थियो । माइक्रो फाइनान्सले १५ प्रतिशत भन्दा बढि ब्याज लिनै पाउँदैन ।
माइक्रो फाइनान्सहरुले एकल कर्जा सीमा नाघेरै कर्जा लगानी गर्ने पनि निर्णय छ । ऋणलाई सही सदुपयोग गर्न ऋणी जिम्मेवार बन्नुपर्नेमा एसोसिएसन उपाध्यक्ष वसन्त लम्सालले जोड दिए । सचिव रामबहादुर यादवले माइक्रो फाइनान्सहरु पनि कर्जा सूचना केन्द्रको प्रणालीमा गइसकेको हुँदा अब ऋण डुप्लिकेसन नहुने बताए ।
अध्यक्ष शर्माले माइक्रो फाइनान्सहरु आफैले निक्षेप संकलन गर्न नपाउने र बैंकको भर पर्नुपर्ने हुँदा आत्मनिर्भरताको बाटो खोजिनुपर्ने आवश्यकता औल्याए । उनले समकालीन मुद्दाका सन्दर्भमा राष्ट्र बैंकका गभर्नरलाई भेटेर ब्रिफिङ गर्ने सुनाए ।