हेमजा । लाहाचोकमा भएको माछापुच्छ्रे कपको उपाधि आयोजक माछापुच्छ्रे त्रिशक्ति युनाइटेड क्लबले हात पारेको छ । आइतबार आयोजक र एलजी एसोसियसनबीच उपाधिका लागि भएको फाइनल खेलमा आयोजकका सन्त गुरुङले गरेको १ गोल नै उपाधिका लागि निर्णायक हुन पुग्यो । उक्त खेलमा गोलकर्ता गुरुङ म्यान अफ दि म्याच घोषित भए ।
विजयी भएसँगै आयोजक समूहले नगद २ लाख २ हजार २० पुरस्कार प्राप्त गरेको छ भने उपविजेता एलजीले १ लाख २२ हजार २ सय २२ प्राप्त गर्‍यो ।
प्रतियोगितामा आयोजकका मनीष थापा सर्वाधिक गोलकर्ता (४), आयोजककै विवेक सन्तोषी उत्कृष्ट खेलाडी, एलजीका दनु थापा उत्कृष्ट मिडफिल्डर, आयोजकका दीपेन्द्र नेपाली उत्कृष्ट डिफेन्स्, आयोजककै प्रभु भण्डारी उत्कृष्ट गोलकिप्पर तथा सहारा क्लब अनुशासित टिम हुन सफल भए ।
समापन कार्यक्रममा नेपाली कांग्रेस लाहाचोक सभापति रामचन्द्र अधिकारी, कांग्रेस माछापुच्छ्रे गाउँपालिका पूर्व संयोजक मधुसुदन अधिकारी तथा जिल्ला समन्वय समिति कास्की सदस्य विष्णुप्रसाद पौडेल, क्लबका सल्लाहकार पानबहादुर जिसीलगायतले प्रतियोगिताको महत्वमाथि चर्चा गर्दै आयोजकप्रति धन्यवाद प्रकट गरे ।
त्यस अवसरमा कास्की आदर्श समाज साउदी अरेबियाबाट लबी क्षत्रीको विशेष पहलमा माछापुच्छ्रे निवासी अग्नि पीडित बाबुराम परिवारको उपचारका लागि ३५ हजार हस्तान्तरण पनि गरियो । त्यस्तै सर्वाधिक गोलकर्ता मनीष थापालाई सम्मानस्वरुप ७ हजार पनि प्रदान गरिएको छ । कार्यक्रममा भूपू सैनिक तथा कास्की आदर्श समाज साउदी अरेबियाका सदस्य भुपेन्द्र सुनारले सहजीकरण गरे ।
क्लब अध्यक्ष वासुदेव ढकालको अध्यक्षतामा भएको समापन कार्यक्रम पूर्व खेल संयोजक तथा सल्लाहकार राजेन्द्र गौतमले सञ्चालन गरेका थिए ।