हेमजा । माछापुच्छ्रे त्रिशक्ति युनाइटेड क्लबको आयोजनामा चैत ३ देखि ६ सम्म प्रथम माछापुच्छ्रे कप–२०७८ हुँदैछ । आयोजकले मंगलबार प्रतियोगितास्थल लाहाचोकमा पत्रकार सम्मेलन गरी प्रतियोगिता तयारी पूरा भएको जानकारी दिएको हो ।
क्लब अध्यक्ष बासुदेव ढकालले प्रतियोगितामा ८ टिमको सहभागिता रहने बताए । प्रतियोगितासँगै लाहाचोकस्थित अर्मला डाँडाबाट टेन्डम पाइलटसहित प्याराग्लाइडिङको पनि प्रवद्र्घन गर्न लागिएको जानकारी दिए।
क्लबका सल्लाहकार पानबहादुर जिसीले मोफसलमा हुने प्रतियोगितामा माछापुच्छ्रे कपको पनि महत्वपूर्ण भूमिका रहने विश्वास व्यक्त गरे ।
कार्यक्रममा अर्थ संयोजक प्रेम ढकाल, पूर्व खेल संयोजक तथा क्लबका सल्लाहकार राजेन्द्र गौतम, सचिव सुशील श्रेष्ठ लगायतले प्रतियोगिताको महत्व र आवश्यकतामाथि चर्चा गरे।
विजेताले २ लाख र उपविजेता टिमले १ लाख रुपैयाँ पुरस्कार प्राप्त गर्नेछ । त्यस्तै अन्य विभिन्न विद्यामा आकर्षक पुरस्कारको व्यवस्था पनि गरिएको छ ।
प्रतियोगिताको गण्डकी प्रदेशका भौतिक पूर्वाधार, सहरी विकास तथा यातायात व्यवस्था मन्त्री कुमार खड्काले उद्घाटन गर्ने कार्यक्रम छ ।