पोखरा । गण्डकी प्रदेशका मुख्यमन्त्री कृष्णचन्द्र नेपाली पोखरेलले प्रदेशले खेलकुद क्षेत्रमा जग हाल्ने काम गरेको बताएका छन् । गण्डकी प्रदेश आइटिएफ तेक्वान्दोको दुईदिने सेमिनार समापनमा बोल्दै उनले गण्डकीको प्रदेशको समृद्धिको आधार धेरै भए पनि त्योभित्रको महत्वपूर्ण पाटो खेलकुद भएको बताए ।
प्रदेश सरकारले सोचेजस्तै गरी खेलकुदलाई अघि बढाउन नसकेको भए पनि त्यसको जगलाई बलियो बनाउन लागेको मुख्यमन्त्री नेपालीले उल्लेख गरे । उनले संविधानले खेलाडीको हक र अधिकार स्थापित गरेको बताउँदै खेलमार्फत मुलुकलाई अन्तर्राष्ट्रियजगत्मा पहिचान बनाउने मात्रै नभई समानताका लागि समेत खेलकुद अपरिहार्य रहेको बताए । उनले भने, ‘खेलाडीको कुनै जात र देश हुँदैन । एक जना खेलाडीका लागि कुनै पनि देशको सिमाले रोक्न सक्दैन ।’ खेलाडी कुनै देशको नहुने बताएका छन् । उनले भने, ‘२१ औं शताव्दीको खेलाडीलाई विश्व खेलकुदको जगमा सम्मानित रुपमा उभ्याउन प्रदेश सरकारले गम्भीररुपमा अघि बढेको छ ।’
गण्डकी प्रदेश नवौं राष्ट्रिय खेलकुद प्रतियोगिताका लागि तयार रहेको बताउँदै मुख्यमन्त्री पोखरेलले अन्य आवश्यक पूर्वाधारको निर्माणका लागि समेत छिट्टै पहल गर्ने बताए । नेपाल आइटिएफ तेक्वान्दो महासंघका केन्द्रीय सदस्य तथा पूर्व सांसद रामहरि खतिवडाले मुलुकको आर्थिक समृद्धिका लागि खेलकुदमा लगानी आवश्यक रहेको बताए । कोभिडका कारण खस्किंदो पर्यटन माथि उठाउन र खेलकुदका अन्तर्राष्ट्रिय प्रतियोगिता आयोजनालाई अघि बढाउनुपर्ने कुरामा उनले जोड दिए । उनले खेलकुदमा लगानी बढाउन र खेलाडीलाई सम्मान गर्न आग्रह गर्दै खेलकुद जगतलाई राज्यले सम्मानजनक रुपमा अघि बढाउनु पर्ने कुरा औंल्याए ।
नेपाल आइटिएफ तेक्वान्दो महासंघका केन्द्रीय अध्यक्ष अञ्जन धमलाले मुलुकको खेलकुद विकासमा आइटिएफ तेक्वान्दोको भूमिका महत्वपूर्ण रहेकोले राज्यले सहयोगको वातावरण बनाउन आग्रह गरे ।
नेपाल आइटिए तेक्वान्दो संघ गण्डकी अध्यक्ष घमबहादुर थापाको अध्यक्षतामा भएको कार्यक्रममा संघका सचिव प्रतीक घर्तीमगरले समेत आफ्ना भनाइ राखेका थिए । सेमिनारमा गण्डकी प्रदेशका ५ जिल्लाका करिब २ सय जना खेलाडीले डान–१, डान–२ र डान–३ को सेमिनारमा सहभागिता जनाएका थिए ।