लेखनाथ । १७ औं लेखनाथ महोत्सव किनबेचको केन्द्रबिन्दु बनेको छ । महोत्सवमा रमाइलोसँगै दैनिक उपभोग्यलगायत विभिन्न सामान सुपथ मूल्यमा पाइने भएपछि महोत्सव व्यापारिक केन्द्र बनेको हो ।
दर्शकले घर फर्किंदा केही न केही सामग्री लिएर घर फर्कने गरेकाले अघिल्ला दिनको तुलनामा कारोबार बढेको आयोजक लेखनाथ उद्योग वाणिज्य संघ कोषाध्यक्ष भरतराज ओझाको दाबी छ । महोत्सवका करिब ३ सय स्टलमा दैनिक उपभोग्य सामग्री अलावा साडीदेखि गाडीसम्म पाइन्छ ।
महोत्सवको पाँचौं दिन चलिरहँदा सोमबारमात्र करिब १५ लाखको आर्थिक कारोबार भएको आयोजकको दाबी छ । हालसम्म करिब २ करोड १५ लाख बराबरको कारोबा भएको प्रचार प्रसार उपसमिति संयोजक गोपीचन्द्र बास्तोलाले जानकारी दिए । सोमबारमात्र करिब १० हजार दर्शकले महोत्सव अवलोकन गरेको र अहिलेसम्म आइपुग्दा दर्शक संख्या करिब ८० हजार पुगेको संघ अध्यक्ष छत्रधर आत्रेयको भनाइ छ ।
दैनिक फरक शैलीको प्रस्तुतिले दर्शकलाई मनोरञ्जन प्रदान गरेको छ । दोहोरीका पारखीदेखि युवालक्षित गरी राखिएको डिजे र पप कन्सर्टका कारण सबै प्रकृतिका दर्शकको सहभागिताले महोत्सव थप रोचक बनाएको छ ।