पोखरा । आजभन्दा २७ वर्षअघि तनहुँको ढोरफिर्दी गाविसमा रहेको हिमाली प्राविको विद्यालय व्यवस्थापन समितिले निर्णय गरेर मनपरि सार्वजनिक जग्गा व्यक्तिलाई भोगचलनका लागि दियो । २०५१ साल बैशाख ११ गते हालको शुक्लागण्डकी नगरपालिका १६ को जग्गा समितिले घरसारको कागज बनाई गैरकानुनी रुपमा बिक्री गरिदिएको हो । समितिका अध्यक्ष यामबहादुर बानियाँ, प्रधानाध्यापक यामबहादुर ठकुरीसहित ७ जना विरुद्ध अख्तियारले अहिले विशेष अदालतमा भ्रष्टाचार मुद्दा दायर गरेको छ । आरोपीहरुमा समितिका सदस्य घनश्याम बानियाँ, हरिकुमारी महत, धुनबहादुर पुलामी, ज्ञानबहादुर बानियाँ र खड्कबहादुर बानियाँ छन् ।
उनीहरुले त्यहाँको जग्गा १ लाख ६९ हजार रुपैयाँमा भोगचलनका लागि बेचेको अनुसन्धानबाट खुलेको छ । आरोपितमध्ये यामबहादुर, धुनबहादुर, ज्ञानबहादुर र खड्कबहादुरको मृत्यु भैसकेको छ । मृत्यु भए पनि उनीहरुले भ्रष्टाचार गरेको देखिएको अख्तियारले जनाएको छ । सबै जनाबाट १ लाख ६९ हजार रुपैयाँ बिगो मागसहित सजायको सिफारिस गरिएको छ । सार्वजनिक जग्गा घरसारको कागजात बनाई आफैले घडेरी नम्बर कायम गरेर भोगचलन गरेको आरोपमा खरिद गर्नेहरुलाई समेत अख्तियारले आरोपी बनाएको छ ।
सन्तबहादुर सिंजालीमगर, तीलुदेवी बराल, डोलराज आचार्य, डिलबहादुर आले, विष्णुमाया थापा, विष्णुप्रसाद लम्साल, शरणबहादुर बिक, बलराम बानियाँ, बुद्दिमाया बिक, बाबुराम बानियाँ, लोकबहादुर माकिम, पूर्णबहादुर बिक र धनबहादुर बिकले विद्यालय व्यवस्थापन समितिलाई पैसा दिएर जग्गा भोगचलन गरेका थिए । सार्वजनिक जग्गा अपचलनको मतियारका रुपमा १३ जनालाई नै कारबाही माग गरिएको अख्तियार प्रवक्ता श्यामप्रसाद भण्डारीले जानकारी दिए । उनका अनुसार भोगचलन गरेकाबाट जग्गाको भोग हटाएर जफत गर्ने गरी मुद्दा दायर भएको हो । जग्गा भोगचलन गरेकामध्ये लोकबहादुर, डोलराज र धनबहादुरको मृत्यु भइसकेको छ ।
६१ लाख भत्ता सचिवले खाए ।

१ लाख ६९ हजार रुपैयाँमा भोगचलनका लागि जग्गा बेचेको अनुसन्धानबाट खुलेको छ

गोरखाको साविक हंशपुर र मुच्चोक गाविसका सचिवले करिब ६१ लाख रुपैयाँ भ्रष्टाचार गरेको खुलेको छ । सामाजिक सुरक्षाभत्ता बापत प्राप्त रकम हिनामिना गरेको आरोपमा तत्कालीन सचिव दीपकबहादुर दर्जी सहित ४ जनाले उक्त रकम निकालेर आफैंले राखेका हुन् । आर्थिक वर्ष २०७३÷०७४ मा साविक हंशपुर गाविसका हेल्थ असिस्टेन्ट सुरेश दवाडी, कार्यालय सहयोगी विशाल विक र साविक मुच्चोक गाविसका अहेव चन्द्रकान्त सुवेदी समेतले सामाजिक सुरक्षा भत्ताको रकम झ्वाम पारेका हुन् ।
सचिव दर्जीले हंशपुरमा दवाडीसँग र मुच्चोकमा सुवेदीसँग संयुक्त खाता सञ्चालन गरेका थिए । उक्त रकम निकालेर लेखापरीक्षण नगरी उनले ६० लाख ९७ हजार ६ सय रुपैयाँ हिनामिना गरेको अख्तियारले जनाएको छ । आर्थिक कारोबारको हिसाब नबुझाई जिविसबाट निकासा भएको तेस्रो चौमासिक सामाजिक सुरक्षा भत्ता वितरण गर्न चेक लिएको तर वितरण नगरेको अनुसन्धानबाट खुलेको छ ।
साविक हंसपुरको २७ लाख २३ हजार २ सय र मुच्चोकको ३३ लाख ७४ हजार ४ सय आफैले निकालेर खर्च गरेको भेटिएको छ । संयुक्त खाताबाट रकम निकालेर कार्यालय सहयोगी विशालको खातामा जम्मा गरेका थिए । दवाडी र विकलाई २७ लाख २३ हजार २ सय बिगो कायम गरी सजाय मागिएको छ भने अर्का आरोपी सुवेदीलाई ३३ लाख ७४ हजार ४ सय बिगो मागिएको छ । सचिव दर्जी घटना भएकै वर्षदेखि फरार छन् । सामाजिक सुरक्षा भत्ताको पैसा लिएर भागेदेखि उनी नफर्किएको गाउँलेहरुले बताए ।