लमजुङ । प्रथम ऐतिहासिक राइनास कप खुला फुटबल प्रतियोगिता सुरु भएको छ । राइनास नगरपालिका– ६ को धमिलिकुवास्थित गौलिटार क्षेत्रीय खेल मैदानमा उक्त प्रतियोगिता सुरु भएको हो ।
राइनास नगरपालिकाका मेयर सिंहबहादुर थापाले प्रतियोगिता उद्घाटन गर्दै राइनासमा निर्माण भएको यस क्षेत्रीय खेलमैदानको स्तरोन्नतिका साथ नगर क्षेत्रभित्र खेलकुदको विकासका लागि नगरपालिका प्रतिवद्ध रहेको बताए । उनले यो खेल मैदान प्रयोगमा आएसँगै अब नगरपालिकामा उत्कृष्ट खेलाडीको उत्पादनमा सहजता आउने विश्वास व्यक्त गरे ।
गौलीटार क्षेत्रीय खेलमैदान समितिले राइनास नगरपालिकाको आर्थिक सहयोग तथा जिल्ला खेलकुद विकास समितिको सहकार्यमा प्रतियोगिताको आयोजना गरेको हो ।
गौलिटार क्षेत्रीय खेलमैदान समिति अध्यक्ष टकेन्द्रनाथ चिलुवालको अध्यक्षतामा भएको कार्यक्रममा नगरपालिकाका प्रमुख प्रशासकीय अधिकृत गोकर्णराज सुयल, नेपाली कांग्रेसको राइनास नगर समितिका सचिव चित्रबहादुर श्रेष्ठ, नेकपा माओवादी केन्द्र राइनास नगर कमिटी अध्यक्ष पुष्पराज खनाल, कांग्रेसका पूर्व जिल्ला उपसभापति प्रेमराज चिलुवाल, पूर्व जिल्ला सदस्य गणेशराज चिलुवाल, एमालेका जिल्ला सदस्य लक्ष्मण चिलुवाल लगायतले बोलेका थिए ।
आयोजिक समितिका उपाध्यक्ष मदनराज चौलागाईले स्वागत गरेको कार्यक्रममा खेल समितिका सचिव गोपाल नेपालीले सञ्चालन गरेका थिए ।

प्रतियोगिता विजेताले १ लाख ५० हजार प्राप्त गर्नेछ

प्रतियोगिता उद्घाटनका अवसरमा मैत्रीपूर्ण २ खेल भए । आयोजक टिम र नगरपालिकाका जनप्रतिनिधि, कर्मचारी सहितको टिमबीचको उक्त खेलमा १–० गोलअन्तरमा पराजित गर्दै आयोजक टिम विजयी भएको छ । एकता महिला समूह पाँचभाइ र अन्नपूर्ण आमा समूह धमिलीकुवाको मैत्रीपूर्ण खेलमा पाँचभाइ विजयी भयो ।
प्रतियोगिताको पहिलो पुरस्कार १ लाख ५० हजार, दोस्रो पुरस्कार १ लाख साथमा कप, मेडल र प्रमाणपत्र रहेको छ । सेमिफाइनलिस्ट २ टिमलाई २५ हजार र प्रमाणपत्रको व्यवस्था गरिएको आयोजक समिति अध्यक्ष चिलुवालले जानकारी दिए । उनका अनुसार अनुशासित टिम, उत्कष्ट गोलरक्षक, सर्वाधिक गोलकर्ता र उत्कृष्ट खेलाडीलाई पुरस्कार स्वरुप १०/१० हजार नगदसहित प्रमाणपत्र प्रदान गरिनेछ । प्रतियोगितामा १३ टिमले भाग लिएका छन् । लाखौं रुपैयाँ खर्चे निर्माण गरिएको गौलीटार क्षेत्रीय खेलमैदान निमार्ण भएपश्चात पहिलो पटक राइनस कप फुटबल प्रतियोगिता भएको हो ।