पोखरा । पोखरामा हुने नवौं राष्ट्रिय खेलकुद प्रतियोगिता आगामी जेठमा हुने भएको छ । नेपाल सरकारका युवा तथा खेलकुद मन्त्री महेश्वरजंग गहतराज (अथक) ले विहिबार पोखरा रंगशाला निरीक्षण गर्दै स्थानिय तहको निर्वाचनपश्चात सो प्रतियोगिता हुने जानकारी दिएका हुन् ।
उनले भने, ‘चालु आवभित्रै पोखरामा नवौं खेलकुद गर्नुपर्ने बाध्यता छ । सकभर जेठभित्र नवौं राष्ट्रिय खेलकुद गण्डकी प्रदेशको राजधानी पोखरामा हुनेछ ।’ एसियन गेममा नेपालले प्रतिफल राम्रो ल्याउने गरी छिट्टै तयारी पार्नुपर्ने चुनौती रहेको मन्त्री गहतराजले जनाए । राष्ट्रिय खेलकुदबाट उत्कृष्ट खेलाडीहरु नै छनौट गर्नुपर्ने प्रावधान भएकोले नवौं राष्ट्रिय खेलकुद सम्पन्न गर्न सबै ध्यान केन्द्रित हुनु पर्ने उनले जनाए ।
कर्मचारीलाई निर्देशन समेत दिंदै मन्त्री गहतराजले छिटोमा जेठ दोश्रो हप्तामा नवौं खेलकुद प्रतियोगिता गर्नुपर्ने बाध्यता रहेको उल्लेखसमेत गरे । गेमको आवश्यकता र पूर्वाधार हेरी कुन जिल्लामा कुन खेल गर्ने भन्ने छलफलपछि टुंगाउने मन्त्री गहतराजले बताए । व्यहारिक र प्रभावकारी ढंगले के कस्तो उपाय अपनाउन सकिन्छ त्यसलाई मध्यनजर गरी सवै खेलकुदमा जुट्नुपर्ने अबस्था आएको उनले जनाए । उनको साथमा मन्त्रालयका सचिव डा. दामोदर रेग्मी, राष्ट्रिय खेलकुद परिषदका निमित्त सदस्य सचिव कुलबहादुर थापा, राखेप बोर्ड सदस्य राजेशकुमार गुरुङ, पश्चिमाञ्चल क्षेत्रीय खेलकुद विकास समिति प्रमुख लक्ष्मण योगी लगायतको उपस्थिति थियो । पोखरामा हुने भनिएको नवौं राष्ट्रिय खेलकुदको कोभिड प्रभावका कारण मिति घोषणा हुन सकेको छैन ।