पोखरा । हत्याका अभियुक्त १६ वर्षपछि पक्राउ परेका छन् । जिल्ला प्रहरी कार्यालय कास्कीले ४६ वर्षीय अशोक गुरुङलाई पक्राउ गरी बुधबार सार्वजनिक गरेको हो ।
१६ वर्षअघि सुनसरीबाट मजदुरी गर्न पोखरा आएका २० वर्षीय रोजन राईको हत्या गरेको आरोपमा उनी पक्राउ परेका हुन् । पोखराको सातमुहानेका गुरुङ हत्याको घटनापछि कुवेत र बहराइन पुगेका थिए ।
नेपाल प्रहरीले इन्टरपोलको सहयोगमा उनलाई बहराइनबाट पक्राउ गरी मंगलबार नेपाल ल्याएको थियो । उनलाई ७ दिन हिरासतमा राखेर अनुसन्धान गर्न जिल्ला अदालत कास्कीको अनुमति दिएको जिल्ला प्रहरी कार्यालय कास्कीका प्रमुख प्रहरी उपरीक्षक रमेश थापाले जानकारी दिए ।
कास्की प्रहरी प्रवक्ता प्रहरी नायव उपरीक्षक सुन्दर तिवारीले घटनाका प्रत्यक्षदर्शीको भनाइ र घटनास्थल मुचुल्का अनुसार अनुसन्धान अघि बढाइ गुरुङलाई पक्राउ गरिएको बताए ।
घटना विवरण अनुसार धरानका रोजन राई २०६३ साल ताका पोखरामा मजदुरी गर्थे । उनले साविक लेखनाथ–१३, सातमुहानेस्थित खुदी खोलामा ग्याबिन तारमा ढुंगा भर्ने काम गर्थे । २०६३ साल वैशाख २९ गते राति गुरुङले राईलाई कुटपिट गरी गम्भीर घाइते बनाएकोमा उनको पश्चिमाञ्चल क्षेत्रीय अस्पताल, पोखरामा उपचार क्रममा जेठ २ मा मृत्यु भएको थियो ।
सो घटनापछि पक्राउ परिने डरले गुरुङ फरार भएका थिए । डिएसपी तिवारीका अनुसार प्रारम्भिक अनुसन्धानमा सो घटनापछि गुरुङ काठमाडौं पुगेका थिए । त्यहाँ ३ महिना बसेर पोखरा फर्किएर १० लाख रुपैयाँ उठाएर भारत हुँदै कुवेत पुगेका थिए । २ वर्ष कुवेत बसेर नेपाल फर्किएका उनी काठमाडौंमा बस्ने गरेका थिए । २०६६ सालतिर बहराइन गए ।
कास्की प्रहरी प्रमुखको जिम्मेवारी लिएपछि एसपी रमेश थापाले रोकिएका फाइलको अनुसन्धान अघि बढाउन निर्देशन दिएका थिए । सो बमोजिम अनुसन्धान हुँदै जाँदा इन्टरपोलको सहयोगमा आरोपीलाई पुस १ मा पुलिसले पक्राउ गरेको पत्रकार सम्मेलनमा जनाइयो ।