लेखनाथ । लेखनाथ उद्योग वाणिज्य संघको आयोजनामा हुने १७ औं लेखनाथ महोत्सवको तयारी अन्तिम चरणमा पुगेको छ । संघले फागुन २६ देखि चैत ७ सम्म लेखनाथमा महोत्सव गर्दैछ ।
मंगलबार आयोजित पत्रकार सम्मेलनमा महोत्सव मूल आयोजक समिति संयोजक छत्रधर आत्रेयले महोत्सवको प्रचारप्रसार, स्टल बुकिङ, स्टल निर्माण, महोत्सवस्थलको व्यवस्थापन लगायत गरी ९५ प्रतिशत तयारी पूरा भएको बताए ।
नेपाल इको प्यानलको मुख्य प्रायोजन र राष्ट्रिय वाणिज्य बैंकको सहप्रायोजन रहने महोत्सवको मुख्य उद्देश्य कोभिड–१९ ले थला परेको अर्थतन्त्र चलायमान बनाइ सो क्षेत्रको आर्थिक गतिविधि बढाउने रहेको आत्रेयले बताए ।
महोत्सवमा महिला विशेष रत्यौली कार्यक्रम, विद्यालयस्तरीय कार्यक्रम, सास्कृतिक कार्यक्रम, आदिवासी जनजाति विशेष कार्यक्रम, कृषि तथा पशुपक्षी प्रदर्शनी, सूचना प्रविधि प्रदर्शनी, शैक्षिक प्रदर्शनी, हस्तकला प्रदर्शनी, जातजातिको सम्मानमा लोप हुन लागेका रीतिरिवाज तथा संस्कृति झल्कने नृत्य, विभिन्न जातजातिको झाँकी र्‍याली तथा भेषभूषा प्रदर्शन, कलाकारको प्रस्तुति, बालउद्यान, खाना महोत्सव, राष्ट्रिय लोकदोहोरी कार्यक्रम, कन्सर्ट लगायत हुने प्रचार संयोजक गोपीचन्द्र बास्तोलाले बताए ।
‘महोत्सव लेखनाथको संस्कृति, स्थानीय उत्पादन, विकास र सम्बृद्धि’ भन्ने मूल नाराका साथ हुने महोत्सवमा करिब ३ सय स्टल रहने छन् । महोत्सवको करिब २ लाख ५० हजार दर्शकले अवलोकन गर्ने र करिब १० करोड बराबरको आर्थिक कारोबार हुने आयोजकको अपेक्षा छ । महोत्सवमा करिब १ करोड ५ लाख आम्दानी भइ १५ लाख बचत हुने अनुमान गरिएको छ । यसअघि माघ दोस्रो साता तय भएको महोत्सव कोरोना महामारीको कारण स्थगित भएको थियो ।