पोखरा । हरिनास गाउँपालिका स्याङ्जाले सञ्चालन गरेको १ घर १ धारा योजनाअन्र्तगत वडा नम्बर २ गुर्जामा खानेपानी योजना सम्पन्न भएको छ । योजना हरिनास गाउँपालिका अध्यक्ष खिमनारायण मानन्धरले उद्घाटन गरे । उनले गाउँपालिकाका जनतालाई घरघरमा खानेपानिको सुविधा दिंदै स्वच्छ खानेपानिको व्यवस्था गर्नु आफ्नो कार्यकालको विशेष काम भएको बताए । उनले भने,‘ खानेपानी जनताको आधारभूत आवश्यकता हो, हरिनास गाउँपालिकाले खानेपानी योजनालाई विशेष महत्व दिँदै काम गरेकाले थुप्रै ठाउँमा योजना सम्पन्न भइसकेका छन् ।’
हरिनास गाउँपालिका २ का अध्यक्ष परशुराम सिग्देलले छोटो समयमा नै योजना सफल बनाएको उपभोक्ता समिति र गाउँवासीलाई धन्यवाद दिए । गुर्जाका २४ घरधुरीका करिब १ सय जना लाभान्वित भएको उक्त योजना गाउँपालिकाको करिब ८ लाख सहयोग र करिब ३ लाख स्थानीय श्रमदानसहित ११ लाख २० हजारमा सम्पन्न भएको उपभोक्ता समितिका अध्यक्ष महेशकुमार थापा ‘मदन’ ले बताए । उद्घाटन कार्यक्रममा वडा सदस्य हिममाया थापा, जनजागरण आमा समूहकी अध्यक्ष सेतीमाया थापा, पर्यटन व्यवसायी प्रेमबहादुर केसी लगायतले बोलेका थिए ।