काठमाडौं । युवा तथा साना व्यवसायी स्वरोजगार कोष सचिवालयका कार्यकारी उपाध्यक्ष डा कल्याण रोकाले अर्थाभावका कारणले कोही पनि बेरोजगार बस्नु नपर्ने बताउनुभएको छ । कोषको १३औँ वार्षिकोत्सव कार्यक्रममा उहाँले पैसाको अभावमा कोही पनि बेरोजगार नहुने बताउनुभयो । “पैसा अभावमा कोही मान्छे बेरोजगार भए हामीकहाँ आउनुहोस् । हामी एक हजारले स्वरोगजार बनाउँछौँ”, उहाँले भन्नुभयो, “हामी लाख खर्च गरेर ३० हजार कमाउन लालयित हुन्छौँ, अब लाख खर्च गरेर ३० हजार कमाउन लालयित बन्ने होइन । हामी त्यस्ता विदेश जानेलाई यही नै स्वरोजगार बनाउँछौँ ।”

कार्यकारी उपाध्यक्ष डा रोकाले पैसाका कारणले मात्र उद्यमी, स्वरोजगार बन्छौँ भन्ने होइन भन्दै हाम्रो सोच परिवर्तन गर्नुपर्ने बताउनुभयो । उहाँले स्थानीय स्रोत साधनलाई समुचित प्रयोग गरेर स्थानीय तहमा नै स्वरोजगार बनाउनुपर्ने बताउनुभयो । उहाँले प्रमाणपत्र धितो राखेर स्वरोजगार बनाउन सरकारले आग्रह गरेर विद्यार्थीलाई कर्जा उपलब्ध गराउन तयार रहेको बताउनुभयो । निर्यातमुखी अर्थतन्त्रलाई जोड नदिएर आयातमुखी अर्थतन्त्रलाई जोड दिनुपर्ने उहाँको भनाइ थियो ।

कोषका कार्यकारी निर्देशक विश्वमोहन अधिकारीले कोषले अहिलेसम्म ८३ हजार ४०९ युवालाई स्वरोजगार बनाएको जानकारी दिनुभयो । उहाँले कोषले पूँजी अभावमा आफ्नो सीप, ज्ञान र प्रतिभा उपयोग गर्न नपाएका बेरोजगार १८ वर्षदेखि ६० वर्ष उमेर समूहका युवा तथा साना व्यवसायीलाई बिनाधितो सुलभ कर्जा उपलब्ध गराउँदै आएको बताउनुभयो । उहाँका अनुसार कोषले बिनाधितो रु दुई लाखदेखि सामूहिकमा रु ३० लाखसम्म कर्जा उपलब्ध गराउँदै आएको छ ।

कोषले हालसम्म रु ११ अर्ब नौ करोड ४८ लाख ३५ हजार लगानी गरिसकेको छ । यस्तै रु तीन अर्ब ८२ करोड दुई लाख ८३ हजार २६६ विपन्न वर्गमा कर्जा प्रवाह गरेको छ । यस्तै कोषले एक हजार ९६८ सहकारी संस्था, २६ बैंक तथा वित्तीय संस्थासँग सहकार्य गर्दै बेरोजगार युवा तथा व्यवसायीलाई कर्जा प्रवाह गरेको छ ।

यस्तै रु १५ करोड ३३ हजार पाँच हजार ४९ ब्याज अनुदान उपलब्ध गराएको कोषले जनाएको छ । कोषका अनुसार ६१ हजार १३२ जनालाई स्वरोजगार बिमा गरेको, एक हजार ६१ जनालाई बिमा क्षतिपूर्ति गराइएको छ । यस्तै रु छ करोड २४ लाख ४८ हजार ५४५ बिमा क्षतिपूर्ति उपलब्ध गराएको छ ।

कार्यकारी निर्देशक अधिकारीले बेरोजगार युवालाई स्वरोजगार सिर्जना गर्ने काममा निरन्तर लागिरहेका बताउनुभयो । उहाँले स्थानीय तहमा रहेका स्रोत साधन प्रयोग गरेर स्वरोजगारमुखी बनाइने बताउनुभयो । विसं २०६५ मा स्थापना भएको कोषमा अहिले नियमित स्वरोजगार कार्यक्रम, सहकार्यमा आधारित साझेदारी कार्यक्रम, कोशी इकोनोमिक करिडोर कार्यक्रम, भेरी–कर्णाली इकोनोमिक करिडोर, काठमाडौँ उपत्यका स्वरोजगार र तराई–मधेस स्वरोजगार कार्यक्रम सञ्चालन भइरहेका छन् ।