मलिन अनुहारमा दौडाहामा पूजा

आदर्श समाज सम्वाददाता
फागुन २०, २०७८
film~

पोखरा । नेपाली फिल्म ‘म यस्तो गीत गाउँछु २’ का मुख्य कलाकार अभिनेता पल शाह हिरासतमा बेचैन बन्दा फिल्म युनिट प्रचारका लागि देशदौडाहामा छ ।
२ वर्षसम्मको कोरोना महामारीले थला परेको फिल्मी बजारको मौनता तोड्दै गत शुक्रबारदेखि यो फिल्म देशव्यापी प्रदर्शनमा आएको हो । फिल्मको सुरुआती व्यापार सन्तोषजनक भए पनि अभिनेत्री पूजा शर्माको मुहारमा उस्तै बेचैन भेटिन्छ । किनकि फिल्म युनिटकै एक सदस्य नावालिगमाथि जबर्जस्ती करणी अभियोगमा जिल्ला प्रहरी कार्यालय तनहुँको हिरासतमा छन् ।
मलिन अनुहारमा बिहीबार पोखराको चिप्लेढुंगास्थित सिने प्लेक्समा उनले दर्शकसामु पल शाहको तत्काल रिहाइ हुने र चाँडै नै सँगै फिल्म हेर्न पाइने सदीक्षा व्यक्त गरिन् । छोटो मन्तव्यमा उनले फिल्मलाई यसैगरी माया गरिदिन पनि आग्रह गरिन् । बुधबारमात्र पललाई भेटेको भन्दै उनले भेटमा ‘हलमा पुग्दा तिमी (पल) लाई दर्शकले निकै मिस गरेको’ कुरा सुनाएको बताइन् । वर्षौ लगाएर गरेको मिहिनेतमा फिल्म आफैले हेर्न नपाए पनि प्रशंसाले उनलाई आनन्द आउने गरेको कुरा शर्माले सुनाइन् ।
फिल्म निर्देशक सुदर्शन थापाले पललाई दर्शकले माया दर्शाएको उल्लेख गर्दै न्याय–अन्यायको जिम्मा अदालतको भएको भनी सटिक उत्तर दिए । ‘हामी कानुनअनुसार हिंड्नुपर्छ । कानुनअनुसार बाँच्नुपर्छ,’ उनले भने, ‘भोलि कानुनले दोषी ठह¥याए दोषी हुन्छ । निर्दोष ठह¥याए निर्दोषी हुन्छ । यो कुरा न तपाईंले बोलेर केही हुनेवाला छ, न मैले बोलेर हुन्छ । कानुनले राइट डिसिजन गर्छ । हामी त्यही पर्खाइमा छौं ।’
रिलिजअघि फिल्म युनिटले फिल्म प्रचारका लागि पल–समीक्षालाई एकसाथ अन्तर्वार्तामा ल्याएको भन्ने विषय मिथ्या आरोपमात्र भएको उनको भनाइ छ । विषम परिस्थितिमा सेन्टिमेन्ट क्याच गर्दै देश दौडाहामा रहनु उचित हो ? भन्ने पत्रकारको जिज्ञासामा निर्देशक थापाले सो विषय नकारात्मक टिप्पणीमात्र हो भन्दै जोगिन खोजे । फिल्मले आक्रामक व्यापार गरिरहेको भन्दै दर्शकले यसैगरी माया गरिदिन फिल्म युनिटले आग्रह गरेको छ । फिल्ममा पल शाह, पूजा शर्मा अलावा हरिहर शर्मा, दिनेश डिसी लगायतको मुख्य भूमिका रहेको छ । फिल्म हलमा पुग्दा दर्शकले अभिनेत्री पूजासँग सेल्फी खिच्न भ्याएका थिए ।
पोखरामा पत्रकार सम्मेलनको चाँजोपाँजो चलचित्र पत्रकार संघ कास्कीले मिलाएको अध्यक्ष अरुण गिरीले बताए । फिल्म युनिट दमौली हुँदै बिहीबार पोखरा आएको र पोखरापछि चितवनतिर जाने अर्का निर्देशक सोभित बस्नेतले बताए ।

Related News

सम्बन्धित समाचार

hero news full width