पोखरा । नेकपा एमाले उपमहासचिव एवं प्रचार विभाग प्रमुख पृथ्वीसुब्बा गुरुङले वर्तमान गठबन्धन लामो समय नटिक्ने दाबी गरेका छन् ।
प्रेस चौतारी नेपाल गण्डकी प्रदेशको प्रथम अधिवेशनको बिहीवार पोखरामा उद्घाटन गर्दै उनले सो कुरा बताएका हुन् । उनले अवसरवादका जगमा बनेको गठबन्धन कमजोर बन्दै गएको आरोप लगाए ।
वर्तमान सरकारले मुलुकको विकास एवं जनताका अपेक्षा सम्बोधन गर्न नसकेको बताउँदै पत्रकारजगत्ले यस किसिमका मुद्दालाई अघि बढाउनुपर्ने आवश्यकता औंल्याए । गण्डकी प्रदेशका संस्थापक मुख्यमन्त्री समेत रहेका गुरुङले पत्रकारिता क्षेत्र जिम्मेवार र मर्यादित हुनुपर्ने बताए । उनले समाजका सत्यतथ्य कुरालाई जनतामाझ ल्याउनुपर्नेमा पनि जोड दिए ।
प्रेस चौतारीमा आवद्ध पत्रकार नेताका वरिपरि घुम्नुभन्दा अध्ययन, अनुसन्धान आधारमा लेखरचना माध्यमबाट जनतालाई सुसूचित गर्दै समृद्ध नेपालको अभियानमा जुट्नुपर्ने सुझाव दिए ।
एमाले सचिव तथा गण्डकी प्रदेश इन्चार्ज पद्मा अर्यालले माओवादीले एससिसी सम्झौतामा सडक र सदनमा दोहोरो चरित्र देखाएको आरोप लगाइन् ।
प्रेस चौतारी नेपाल गण्डकी अध्यक्ष सुष्मा पौडेलको अध्यक्षतामा भएको उद्घाटन समारोहमा विभिन्न वक्ताले मुलुकको समृद्धि, विकास एवं राजनीतिक परिवर्तनमा संचारजगतको ठूलो भूमिका रहेको बताएका थिए । अधिवेशनले आगामी कार्यकालका लागि नयाँ नेतृत्व चयन गर्ने जनाइएको छ । अधिवेशनमा भाग लिन गण्डकीका ११ जिल्लाबाट प्रतिनिधि पोखरा आएका छन् ।